SAJUMLAH 3 WEWENGKON KALURAHAN DI KOTA SUKABUMI BARIS KALIWATAN KU JALAN TOL BOCIMI

Reporter : ENDANG SUMARDI

Sajumlah 3 wewengkon Kalurahan di Kota Sukabumi, anu ngawengku Kalurahan Karangtengah jeung Kalurahan Karamat Kacamatan Gunungpuyuh sarta Kalurahan Subangjaya Kacamatan Cikolé, baris kaliwatan ku Jalan Tol Bocimi (Bogor-Ciawi-Sukabumi). Kapala Kantor ATR BPN (Agraria jeung Tata Rohang Badan Patanahan Nasional) Kota Sukabumi, A. Wajah Ganjar ngajelaskeun, pikeun ngarojong kalancaran palaksanaan pangwangunan éta jalan tol téh, Kantor ATR BPN Kota Sukabumi, dina taun 2018 ieu baris ngalaksanakeun pangukuran jeung pangbébasan taneuh salega 10 héktar, anu sumebar di 3 wewengkon Kalurahan di Kota Sukabumi.

Lantaran pihak Kantor ATR BPN Kota Sukabumi, geus meunang pancén ti Kanwil (Kantor Wilayah) ATR BPN Propinsi Jawa Barat, sangkan dina taun 2018 ieu ngalaksanakeun pangukuran jeung pangbébasan taneuh di wewengkon Kota Sukabumi, pikeun kapentingan pangwangunan Jalan Tol Bocimi. Sabab pangwangunan éta jalan tol sapanjang 53,6 kilo méter téh, ditargétkeun ku Pamaréntah Puseur, kudu réngsé dina taun 2019 nu bakal datang, lantaran asup kana Proyék Strategis Nasional. Anapon prosés pangukuran éta taneuh téh baris sagancangna dilakanakeun, sabab ditargétkeun kudu réngsé dina taun 2018 ieu. Lantaran pangwangunan éta jalan tol téh, di Kota Sukabumi baris dilaksanakeun saupama geus réngsé di Kabupatén Sukabumi.

Sedengkeun pikeun ngarojong kalancaran prosés pangukuran éta taneuh téh, pihak Kantor ATR BPN Kota Sukabumi baris ngalaksanakeun koordinasi jeung sakumna pihak nu aya kaitannana, diantarana jeung pihak DPU-PRP-KPP (Dines Pekerjaan Umum, Panataan Rohang, Paimahan, Kawasan Pamukiman jeung Patanahan) Kota Sukabumi, sarta jeung pihak Kontraktor Pangwangunan Jalan Tol Bocimi. Sabab ngayakeun taneuh pikeun kapentingan pangwangunan éta jalan tol téh, teu gampang saperti ngabalikeun dampal leungeun, lantaran ngabutuhkeun waktu anu panjang sarta kudu nyumponan pasyaratan téhnis jeung nu séjénna.

Kapala Kantor ATR BPN Kota Sukabumi ngajelaskeun, Pangwangunan Jalan Tol Bocimi téh, ngarupakeun sala sahiji tina tilu usulan pangwangunan Walikota Sukabumi, H. Mohamad Muraz, S.H., M.M. ka Persidén RI, Ir. H. Joko Widodo, sabagé kamandang jeung kahayang warga masyarakat Kota Sukabumi katut sabudeureunnana. Sedengkeun dua pangwangunan séjénna anu diusulkeun ku Walikota Sukabumi ka Persidén RI téh, nya éta pangwangunan double track atawa jalur ganda Karéta Api Bogor-Sukabumi jeung pangwangunan Bandara Sukabumi, sarta palaksanaan pangwangunannana ditargétkan kudu réngsé dina taun 2019 jeung 2020 nu bakal datang.