SAJUMLAH 4 BAKAL PASLON WALIKOTA KATUT WAKIL WALIKOTA SUKABUMI GEUS DAPTAR KA KPU KOTA SUKABUMI

Reporter : ENDANG SUMARDI

Sajumlah 4 Bakal Paslon (Pasangan Calon) Walikota katut Wakil Walikota Sukabumi anu baris miluan Pilkada (Pamilihan Kapala Daérah) Kota Sukabumi Periodeu Taun 2018-2023, geus daptar ka KPU (Komisi Pamilihan Umum) Kota Sukabumi, cindekna dina poé pamungkas daptar, nya éta dina tanggal 10 Januari 2018, dibarengan ku Pangurus Parpol (Partéy Politik) Pangusung jeung Timsés (Tim Suksés)-na, sarta rélawan jeung simpatisanana masing-masing.

Anapon ka 4 éta Bakal Paslon Walikota katut Wakil Walikota Sukabumi téh, nya éta Bakal Paslon Mulia (Mulyono katut Ima Slamet) daptar dina pukul 10.15 WIB, Bakal Paslon Dermawan (Dédi R. Wilaya katut Hikmat Nuristawan) daptar dina pukul 13.00 WIB, Bakal Paslon Faham (Achmad Fahmi katut Andri Setiawan Hamami) daptar dina pukul 16.30 WIB, sarta Bakal Paslon Ijabah (Insya Alloh Jona Arizona katut Hanafie Zain Barokah) daptar dina pukul 21.00 WIB.

Ngan sok sanajan datangna ka 4 éta Bakal Paslon Walikota katut Wakil Walikota Sukabumi ka KPU Kota Sukabumi téh teu bareng, tapi nimbulkeun kasibukan pikeun sakumna Komisionér KPU Kota Sukabumi jeung aparat kaamanan, sarta ruas jalan Otista cindekna di hareupeun Kantor KPU Kota Sukabumi sempet ngarandapan macét, alatan réa Pangurus Parpol Pangusung jeung Timsésna, sarta rélawan jeung simpatisanana masing-masing, anu milu marengan daptar ka 4 éta Bakal Paslon Walikota katut Wakil Walikota Sukabumi, boh anu ngagunakeun kandaraan roda 2 boh anu ngagunakeun kandaraan roda 4.

Ketua KPU Kota Sukabumi, Hamzah, S.Ag. ngajelaskeun, pihakna baris sagancangna ngalaksanakeun vérifikasi pasaratan ti ka 4 éta Bakal Paslon Walikota katut Wakil Walikota Sukabumi. Saupama masih aya kakurangan pasaratan ti ka 4 éta Bakal Paslon Walikota katut Wakil Walikota Sukabumi téh, kudu sagancangna dilengkepan, boh nu aya kaitanana jeung pasaratan panyalonan boh nu aya kaitanana jeung pasaratan calon. Sabab saupama teu sagancangna dilengkepan, panyalonanana kaancam digugurkeun.

Salajuna dijelaskeun, sanggeus réngsé daptar ka KPU Kota Sukabumi, ka 4 éta Bakal Paslon Walikota katut Wakil Walikota Sukabumi téh, dina tanggal 11 Januari 2018, ngalaksanakeun médical chéck-up di RSHS (Rumah Sakit Hasan Sadikin) Bandung, pikeun maluruh kaayaan kaséhatan jeung ngadetéksi panyakit ti ka 4 éta Bakal Paslon Walikota katut Wakil Walikota Sukabumi. Lantaran dumasar kana aturan jeung undang-undang anu ditetepkeun, satiap Bakal Paslon Kapala Daérah, kudu ngalaksanakeun médical chéck-up di Rumah Sakit Tipeu A.