TAUN ANGGARAN 2017 GEUS DIRÉNGSÉKEUN KU RUPA-RUPA KAHASILAN JEUNG KAKURANGAN

Reporter : ENDANG SUMARDI

Sakumaha anu ditandeskeun ku Walikota Sukabumi, H. Mohamad Muraz, S.H., M.M., Taun Anggaran 2017 geus diréngsékeun ku rupa-rupa kahasilan jeung kakurangan. Tah kulantaran kitu, rupa-rupa kahasilan sangkan salawasna dipertahankeun jeung ditingkatkeun dina Taun Anggaran 2018 ieu. Sedengkeun rupa-rupa kakurangan supaya dijadikeun palajaran sakaligus dioméan jeung ditingkatkeun, boh dina pangalolaan anggaran jeung administrasi pamaréntahan, boh dina panyalagaraan pangwangunan jeung palayanan publik.

Panandesan Walikota Sukabumi éta téh ditepikeun dina biantara, basa jadi Inspéktur Upacara dina Upacara Pangibaran Bendéra Nagara Sang Mérah Putih awal taun 2018, tanggal 17 Januari 2018, di Buruan Apél Setda Kota Sukabumi. Anapon nu jadi Perwira Upacara, nya éta Sekertaris BKPSDM (Badan Kapagawéan jeung Pangembangan Sumber Daya Manusa) Kota Sukabumi, Drs. Adé Suhérman, M.Si., Komandan Upacara, Ropinus Déro, S.IP., nu maca Naskah Pancasila, Inspéktur Upacara, nu maca Naskah Pembukaan Undang-Undang Dasar 1945, Budi Purwanto, S.IP., M.Si., nu maca Téks Panca Prasetya Korpri, Wahyu Retnaningtyas Utama, S.H., M.H., Pangibar Bendéra, Hauwéra Aulia Héndayani, S.STP., Réfaldo Ian Al-Hadad, S.STP. jeung Hari Adhadi Wijaya, S.Kom., sarta Korsik, Gema Swara Korpri Kota Sukabumi.

Dina bagian séjén biantarana, Walikota Sukabumi ngajak ka sakumna OPD (Organisasi Parangkat Daérah) sarta Kacamatan jeung Kalurahan di Kota Sukabumi, sangkan dina awal taun 2018 ieu, nguatkeun deui visi jeung misi, hususna dina ngajalankeun roda pamaréntahan. Lantaran taun 2018 ieu téh ngarupakeun taun pamungkas mangsa kapamingpinan Walikota katut Wakil Walikota Sukabumi Periodeu Taun 2013-2018. Tah kukituna, sakumna OPD sarta Kacamatan jeung Kalurahan di Kota Sukabumi kudu bisa mastikeun, yén sakumna jangji pulitik salila 5 taun kapamingpinan Walikota katut Wakil Walikota Sukabumi Periodeu Taun 2013-2018, bisa diwujudkeun sacara hadé. Salian ti éta, Walikota Sukabumi meredih ka sakumna OPD sarta Kacamatan jeung Kalurahan di Kota Sukabumi, sangkan rupa-rupa targét anu can bisa diwujudkeun sacara hadé, dina jangka waktu 4 bulan ka hareup supaya diwujudkeun jeung disampurnakeun.

Hadir dina kasempetan éta, Wakil Walikota Sukabumi, Unsur FKPD (Forum Koordinasi Pingpinan Daérah) Kota Sukabumi, Pingpinan katut Anggota DPRD Kota Sukabumi, Ketua TP PKK Kota Sukabumi, PLT (Palaksana Tugas) Sekertaris Daérah Kota Sukabumi, para Kapala OPD, para Camat jeung Lurah, para Alim Ulama, Inohong Masarakat, Pingpinan Organisasi Wanoja jeung Pamuda, sarta para tamu ondangan lianna.