PANANDATANGANAN NOTA KASAPAHAMAN NGEUNAAN PANGALOLAAN KAKAYAAN NAGARA

Reporter : ENDANG SUMARDI

Pamaréntah Kota Sukabumi jeung Kanwil DJKN (Kantor Wilayah Diréktorat Jéndral Kakayaan Nagara) Jawa Barat, ngalaksanakeun panandatanganan Nota Kasapahaman ngeunaan Pangalolaan Kakayaan Nagara jeung Pangajénan Palaksanaan Lélang Barang Milik Pamaréntah Kota Sukabumi. Salian ti éta, ogé dipasrahkeun Sértifikat Manajemén Mutu ISO 9001 : 2015, ti PT Tirta Murni Sértipikasi, sabagé Lembaga Sértifikasi IOS (International Organization for Standarization), ka Pamaréntah Kota Sukabumi,

Panandatangan éta Nota Kasapahaman téh, dilaksanakeun ku Walikota Sukabumi, H. Mohamad Muraz, S.H., M.M. katut Kapala Kanwil DJKN Jawa Barat, Nuning Sri Rejeki Wulandari, dina Upacara Pangibaran Bendéra Nagara Sang Mérah Putih awal taun 2018, tanggal 17 Januari 2018, di Buruan Apél Setda Kota Sukabumi, disaksian ku Wakil Walikota Sukabumi, H. Achmad Fahmi, S.Ag., M.M.Pd., katut PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si.

Dina biantarana Walikota Sukabumi nandeskeun, sakumna pihak kudu ngarasa reueus, lantaran dina sajero taun 2017 hususna tina aspék akuntabilitas LAKIP (Laporan Kinerja Instansi Pamariétah), Kota Sukabumi masih nyangking layang pangajén ti Pamaréntah Puseur, sabagé sala sahiji Kota jeung Kabupatén pang hadéna sa Indonésia. Kitu deui prédikat WTP (Wajar Tanpa Pangacualian) ti BPK (Badan Pamariksa Kauangan) RI, Kota Sukabumi masih bisa mertahankeunana sacara hadé. Saterusna ditandeskeun, ku gawé anu rancagé ti sakumna pihak, dina taun 2017 Kota Sukabumi meunang rupa-rupa layang pangajén, boh ti Pamaréntah boh ti Lembaga Non Pamaréntah, anu pamungkas nya éta meunang Sértifikat Manajemén Mutu ISO 9001 : 2015, pikeun Bagian Pangadaan Barang jeung Jasa Setda Kota Sukabumi, ti PT Tirta Murni Sértifikasi.

Disagigireun ti éta, ogé 3 proyék strategis Pamaréntah Puseur anu diusulkeun ku Walikota Sukabumi sacara langsung ka Persidén RI, Ir. H. Joko Widodo, diréspon sacara hadé jeung positip, sarta geus ditindaklaju sacara kongkrit. Anapon ka 3 éta proyék strategis téh, nya éta Ngahangkeutkeun Pangwangunan Jalan Tol Bocimi (Bogor-Ciawi-Sukabumi) anu baris diteruskeun nepi ka Cianjur jeung Padalarang, Pangwangunan Dobel Track atawa Jalur Ganda Karéta Bogor-Sukabumi anu baris diteruskeun nepi ka Cianjur, jeung Pangwangunan Bandara Sukabumi, anu tempatna teu jauh ti Kota Sukabumi, pikeun ngalayanan 3 wewengkon, nya éta Kabupatén Sukabumi, Kota Sukabumi jeung Kabupatén Cianjur.