DISDUKCAPIL KOTA SUKABUMI BARIS NGARÉNGSÉKEUN Ě-KTP SAMÉMÉH PANYALAGARAAN PILKADA BARENG TAUN 2018

Reporter : ENDANG SUMARDI

Disdukcapil (Dines Kapadumukan jeung Panyatetan Sipil) Kota Sukabumi, baris ngaréngsékeun Ě-KTP (Kartuh Tanda Padumuk Ělékronik) warga masarakat Kota Sukabumi, saméméh panyalagaraan Pilkada (Pamilihan Kapala Daérah) Bareng Taun 2018, nya éta Pilkada Gubernur katut Wakil Gubernur Jawa Barat sarta Pilkada Walikota katut Wakil Walikota Sukabumi Periodeu Taun 2018-2023. Tah kukituna, sakumna warga masarakat Kota Sukabumi anu ngagunakeun Sukat (Surat Katerangan) KTP, saméméh panyalagaraan éta Pilkada baris diganti ku Ě-KTP.

Kapala Disdukcapil Kota Sukabumi, Iskandar, S.IP., M.T. ngajelaskeun, danget ieu Disdukcapil Kota Sukabumi ngabogaan 6 rébu balangko Ě-KTP, boh pikeun ngaganti Sukat KTP nu digunakeun ku warga masarakat boh pikeun nu anyar nyieun. Saterusna dijelaskeun, biasana Disdukcapil Kota Sukabumi ngan ukur meunang 2 rébu balangko Ě-KTP ti Pamaréntah Puseur, Ngan Disdukcapil Kota Sukabumi terus ngalaksanakeun koordinasi jeung Pamaréntah Puseur, nya éta jeung Kemendagri (Kementrian Dalem Negri), sangkan Kota Sukabumi dibéré dispensasi meunang balangko Ě-KTP leuwih réa, lantaran baris nyanghareupan Pilkada Bareng Taun 2018. Hasilna cukup ngagumbirakeun pikeun sakumna pihak, lantaran Disdukcapil Kota Sukabumi meunang 6 rébu balangko Ě-KTP, pikeun dicitak jeung dipasrahkeun ka warga masarakat Kota Sukabumi, ngaliwatan Kacamatan jeung Kalurahanana masing-masing.

Salian ti éta ogé dijelaskeun, warga masarakat Kota Sukabumi anu ngajukeun nyieun Ě-KTP, dina saban poéna terus nambahan, nya éta antara 85 nepi ka 100 urang, sabab warga masarakat anu nincak umur 17 taun dina saban poéna terus nambahan. Leuwih jauh Kapala Disdukcapil Kota Sukabumi ngajelaskeun, dina ahir taun 2017, warga masarakat Kota Sukabumi anu ngajukeun nyieun Ě-KTP ngarandapan undak, nya éta ampir ngahontal 92 peresén. Kitu deui nu nyieun Akteu Kamatian, ngarandapan undak nepi ka 70 peresén, lantaran Disdukcapil Kota Sukabumi salawasna usaha satékah polah ngalaksanakeun program Si Jempol (Siap Jemput Bola) Palayanan Nyieun Administrasi jeung Dokumén Kapadumukan hususna KK (Kartuh Kulawarga) jeung Ě-KTP.

Salajuna dijelaskeun, dina taun 2018 ieu, Disdukcapil Kota Sukabumi baris ngaronjatkeun palayanan ka sakumna lapisan warga masarakat Kota Sukabumi, hususna palayanan nyieun Administrasi jeung Dokumén Kapadumukan, ngaliwatan program Si Jempol, nya éta saméméhna dina jero sabulan dilaksanakeun sakali jadi dua kali. Disagigireun ti éta, Kapala Disdukcapil Kota Sukabumi ogé cumeluk ka sakumna lapisan warga masarakat Kota Sukabumi anu geus wajib ngabogaan Ě-KTP, sangkan pro aktif nyieun Dokumén Kapadumukan, hususna KK jeung Ě-KTP. Sabab éta Dokumén Kapadumukan téh kacida pentingna dibogaan ku satiap warga masarakat, pikeun nyumponan rupa-rupa kapentingan, saperti keur nyieun Paspor, BPJS Kaséhatan jeung Katanagakerjaan sarta jeung keur nu séjénna.