WAKIL WALI KOTA SUKABUMI NGAÉVALUASI KINERJA APARAT KACAMATAN JEUNG KALURAHAN SA KACAMATAN BAROS

Reporter : ENDANG SUMARDI

Wakil Wali Kota Sukabumi, H. Achmad Fahmi, S.Ag., M.M.Pd., dibarengan ku Kapala Widang Kapagawéan BKPSDM (Badan Kapagawéan jeung Pangembangan Sumber Daya Manusa) Kota Sukabumi, Dian Sucianti, S.Ě., M.M. katut Camat Baros, Dra. Yunita Nusméri Sitepu, M.M., ngaévaluasi kinerja Aparat Kacamatan jeung Kalurahan sa Kacamatan Baros, cindekna tanggal 29 Januari 2018, di Rohangan Pasamoan Kacamatan Baros.

Wakil Wali Kota Sukabumi ngajelaskeun, kinerja Aparat Kacamatan jeung Kalurahan sa Kecamatan Baros dina umumna geus hadé, ngan kudu dironjatkeun deui, hususna dina méré jeung ngaronjatkeun ajén palayanan ka masarakat. Lantaran Aparat Kacamatan jeung Kalurahan téh ngarupakeun garda pang hareupna Pamaréntah Kota Sukabumi, hususna dina méré jeung ngaronjatkeun ajén palayanan ka masarakat dina rupa-rupa widang. Komo deui pikeun sakumna Aparat Kacamatan Baros mah. Sabab ku geus réngséna Pangwangunan Gedong anyar Kacamatan Baros téh, kudu diimbangan ku ajén palayanan ka masarakat ka nu leuwih hadé deui.

Salajuna ditandeskeun, masalah kakurangan SDM (Sumber Daya Manusa) Aparat Kacamatan jeung Kalurahan di Kacamatan Baros, ulah dijadikeun sala sahiji alesan ajén palayanan ka masarakat turun. Lantaran masalah kakurangan SDM Aparat téh, lain di Kacamatan jeung di Kalurahan wungkul, tapi ampir di sakumna SKPD (Satuan Kerja Parangkat Daérah) di lingkungan Pamaréntah Kota Sukabumi.

Malah dina danget ieu, SKPD anu pang réana kakurangan jeung ngabutuhkeun PNS (Pagawé Negri Sipil) téh, nya éta di Kota Sukabumi, hususna pikeun widang atikan jeung kaséhatan, kaasup di Tingkat Pamaréntah Kacamatan jeung Kalurahan. Sabab PNS di SKPD di lingkungan Pamaréntah Kota Sukabumi téh, dina saban taunna réa nu pangsiun. Salian ti éta, ogé geus 11 taun ka tukang, Pamaréntah Kota Sukabumi teu meunang jatah panarimaan CPNS (Calon Pagawé Negri Sipil) ti Pamaréntah Puseur, alatan Pamaréntah Puseur nepi ka danget ieu téh masih kénéh nerapkeun moratorium panarimaan CPNS, anu kacida mangaruhannana kana terus ngurangannana jumlah PNS, hususna di lingkungan Pamaréntah Kota Sukabumi.

Dina kasempetan éta, Wakil Wali Kota Sukabumi oge cumeluk ka sakumna Aparat Kacamatan jeung Kalurahan sa Kacamatan Baros, sangkan salawasna usaha satékah polah méré palayanan anu hadé ka masarakat dina rupa-rupa widang, dibarengan ku soméah jeung nanya ku basa anu sopan. Sabab sakumna Aparat Kacamatan jeung Kalurahan umumna sakumna PNS téh, ngarupakeun abdi atawa palayan masarakat, pamaréntah jeung nagara.