KAAYAAN KOTA SUKABUMI AHIR-AHIR IEU DIGEUNJLEUNGKEUN KU ODGJ

Reporter : ENDANG SUMARDI

Wali Kota Sukabumi, H. Mohamad Muraz, S.H., M.M. nandeskeun, kaayaan Kota Sukabumi ahir-ahir ieu digeunjleungkeun ku ODGJ (Orang Dengan Gangguan Jiwa), anu nyerang ka sajumlah Alim Ulama di sababaraha Pondok Pasantren, sarta dina malem Senén, 11 Pébruari 2018, ogé nyerang ka sala saurang Pastur di sala sahiji Gareja. Tah kulantaran kitu, Wali Kota Sukabumi meredih ka sakumna lapisan warga masarakat jeung pagawé di lingkungan Pamaréntah Kota Sukabumi, saupama nempo aya ODGJ nu kukulamprengan di wewengkon Kota Sukabumi, sangkan sagancangna dilaporkeun ka Satpol PP (Satuan Polisi Pamong Praja) atawa ka Polres Sukabumi Kota, pikeun sagancangna diamankeun jeung ditartibkeun. Ěta panandesan jeung pameredih Wali Kota Sukabumi téh, ditepikeun dina biantara, basa jadi Pembina Apél  Pangibaran Bendera Nagara Sang Mérah Putih, tanggal 12 Pébruari 2018, di Buruan Apél Setda Kota Sukabumi.

Anapon nu jadi Perwira Apél, nya éta Kapala Widang Komunikasi jeung Statistik Diskominfo (Dines Komunikasi jeung Informatika) Kota Sukabumi, Tantan Sontani, S.IP., M.Si., Pingpinan Apél, Kasi Persandian Diskominfo Kota Sukabumi, Tatang, S.E., Pangibar Bendéra, Aép Saépuloh, A.Md., Linda Damayanti, S. Kom. jeung Mh. Elga Algiansyah, A.Md., Nu Maca Naskah Pancasila, Pembina Apél, Nu Mawa Naskah Pancasila, Budi Haryatna, Nu Maca Naskah Undang-Undang Dasar 1945, PLT Kasi Infrastruktur TIK (Téknologi Informasi jeung Komunikasi) Diskominfo Kota Sukabumi, Gian Purnama, S.T., Nu Maca Téks Panca Prasetya Korpri, Kasi Pangalolaan Data Statistik Diskominfo Kota Sukabumi, Dicky Faizal Rahmat, S.IP., Pamanggul Catur, Kasubbag Umum jeung Kapagawéan Diskominfo Kota Sukabumi, Luri Rustia Indriani, S.IP., Nu Maca Doa, Kasubbag Perencanaan jeung Kauangan Diskominfo Kota Sukabumi, Ilham Gunawan, S.IP., jeung Satuan Musik, Gema Swara Korpri Kota Sukabumi.

Hadir dina kasempetan éta, Wakil Wali Kota Sukabumi, H. Achmad Fahmi, S.Ag., M.M.Pd., PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., Ketua katut Wakil Ketua TP PKK Kota Sukabumi, Pangurus DWP (Dharma Wanita Persatuan) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah), para Camat katut para tamu ondangan séjénna.

Salian ti éta, Wali Kota Sukabumi ogé nandeskeun, Pamaréntah Kota Sukabumi salawasna maréntah ka sakumna OPD nu aya kaitannana, sangkan salawasna ngamankeun jeung nartibkeun ODGJ kaasup andar-andar jeung nu ngusapir sarta anak jalanan di Kota Sukabumi, pikeun ngaronjatkeun kaamanan jeung katartiban sarta kaayeman jeung katengtreman warga masarakat.

Salajuna Wali Kota Sukabumi ngajelaskeun ngeunaan prosés jeung palaksanaan tahapan Pilkada (Pamilihan Kapala Daérah) Kota Sukabumi Taun 2018, nya éta dina poé Senén, 12 Pébruari 2018, KPU (Komisi Pamilihan Umum) Kota Sukabumi netepkeun Paslon (Pasangan Calon) Walikota katut Wakil Walikota Sukabumi anu miluan Pilkada Kota Sukabumi Taun 2018, sarta dina poé Salasa, 13 Pébruari 2018, KPU Kota Sukabumi ngocok Nomor Urut Paslon Walikota katut Wakil Walikota Sukabumi nu jadi pamilon Pilkada Kota Sukabumi Taun 2018. Sedengkeun palaksanaan kampanyeu Paslon Walikota katut Wakil Walikota Sukabumi pamilon Pilkada Kota Sukabumi Taun 2018, dilaksanakeun ti Tanggal 15 Pébruari 2018 nepi ka Tanggal 23 Juni 2018, sarta palaksanaan pamilihan atawa panyoblosannana dina Tanggal 27 Juni 2018 nu bakal datang.