POLRES SUKABUMI KOTA GEUS NGABENTUK SATGAS PENJAGA UMAT

Reporter : ENDANG SUMARDI

Polres Sukabumi Kota geus ngabentuk Satgas (Satuan Tugas) Penjaga Umat, ngalibetkeun 16 Polsek di wilayah hukum Polres Sukabumi Kota. Anapon maksud jeung tujuan dibentukna éta Satgas téh, nurutkeun Kapolres Sukabumi Kota, AKBP Susatyo Purnomo Condro, S.H., S.I.K., M.Si., nya éta sabagé sala sahiji bentuk jeung wujud nyata perhatian sarta kapadulian Polres Sukabumi Kota, dina ngaronjatkeun kaamanan jeung kaayeman warga masarakat sarta kondusifitas wilayah hukum Polres Sukabumi Kota, tina rupa-rupa ancaman kaamanan jeung rupa-rupa hal anu teu diharepkeun ku sakumna pihak, kaasup isu téror ODGJ (Orang Dalam Gangguan Jiwa), anu ngamcam para Alim Ulama jeung Pingpinan Pondok Pasantren di wilayah hukum Polres Sukabumi Kota.

Tah kuayana éta hal téh, Polres Sukabumi Kota kudu sagancangna nyokot léngkah jeung tarékah sarta usaha satékah polah, pikeun ngungkulan éta pasualan. nya eta ku ngabentuk Satgas Penjaga Umat. Kapolres Sukabumi Kota ngajelaskeun, dina ngungkulan eta pasualan téh, lain ngan saukur ku nanjeurkeun hukum wungkul, tapi ogé baris nyanghareupkeun kontrol opini, pikeun nyadarkeun warga masarakat, supaya bisa leuwih wijak dina narima rupa-rupa béwara jeung isu anu nyebar.

Salian ti éta, Polres Sukabumi Kota ogé baris salawasna usaha satékah polah jeung sacara rutin ngajaring sakaligus ngaréhabilitasi ODGJ anu kukulamprengan di wilayah hukum Polres Sukabumi Kota, gawé bareng jeung Dines Pol PP (Polisi Pamong Praja) Kota Sukabumi, Dines Sosial Kota Sukabumi, Dines Kaséhatan Kota Sukabumi, jeung RSUD (Rumah Sakit Umum Daérah) R. Syamsudin, S.H. Kota Sukabumi, sangkan éta ODGJ téh diperhatikeun sacara hadé jeung pantes.

Salajuna Kapolres Sukabumi Kota cumeluk sakaligus meredih ka sakumna lapisan warga masarakat di wilayah hukum Polres Sukabumi Kota, saupama nempo aya jalma nu diduga ODGJ, sangkan sagancangna dilaporkeun ka aparat kapulisian pang deukeutna, sarta ulah gampang kaasut ku isu atawa béwara anu can tangtu jeung jelas bener henteuna. Disagigireun ti éta, Kapolres Sukabumi Kota ogé ngaharepkeun ka sakumna unsur instansi nu aya kaitannana jeung ka sakumna lapisan warga masarakat di wilayah hukum Polres Sukabumi Kota, sangkan salawasna usaha satékah polah jeung nguntun gawé bareng anu hadé, sarta leuwih paduli ka ODGJ, anu isuna rupa-rupa.