KPU KOTA SUKABUMI NYALAGARAKEUN DÉKLARASI KAMPANYEU RÉPÉH-RAPIH

Reporter : ENDANG SUMARDI

KPU (Komisi Pamilihan Umum) Kota Sukabumi, nyalagarakeun Déklarasi Kampanyeu Répéh-Rapih nguriling Kota Sukabumi, pikeun 4 Paslon (Pasangan Calon) Wali Kota katut Wakil Wali Kota Sukabumi anu milu Pilkada (Pamilihan Kapala Daérah) Kota Sukabumi Taun 2018. Anapon ka 4 éta Paslon téh, ngawengku Nomer Urut 1 Paslon Ijabah (Insya Alloh Jona Arizona katut Hanafie Zain Barokah), Nomer Urut 2 Paslon Faham (Achmad Fahmi katut Andri Setiawan Hamami), Nomer Urut 3 Paslon Mulia (Mulyono katut Ima Slamet), sarta Nomer Urut 4 Paslon Dermawan (Dédi R. Wilaya katut Hikmat Nuristawan).

Déklarasi Kampanyeu Répéh-Rapih anu lumangsung tanggal 18 Pébruari 2018 téh, dilepas sacara resmi ku Wali Kota Sukabumi, H. Mohamad Muraz, S.H., M.M., dibarengan ku Unsur FKPD (Forum Komunikasi Pingpinan Daérah) Kota Sukabumi, PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., para Asistén Daérah Setda Kota Sukabumi katut Ketua KPU Kota Sukabumi, Hamzah, S.Ag.

Hadir dina kasempetan éta, para Kapala OPD (Organisasi Parangkat Daérah) sarta instansi jeung lembaga nu aya kaitannana, para Camat jeung Lurah, para Pingpinan Parpol (Partéy Politik), para Timsés (Tim Suksés), Rélawan jeung Simpatisan Paslon Wali Kota katut Wakil Wali Kota Sukabumi, sarta para tamu ondangan lianna.

Anapon ruteu Déklarasi Kampanyeu Répéh-Rapih nguriling Kota Sukabumi téh, nya éta start ti Jalan Pembangunan, Jalan Sarasa jeung Jalan Garuda, saterusna asup ka Jalan Baros, Jalan Merdéka, Jalan Pelabuhan II, Jalan Lingkar Selatan jeung Jalan Cemerlang, sajuna asup Jalan K.H. Ahmad Sanusi, Jalan Bhayangkara, Jalan Suryakencana, Jalan R. Syamsudin, S.H., Jalan Siliwangi, Jalan R.A. Kosasih, jeung finish di Jalan Pembangunan.

Dina kasempetan éta Wali Kota Sukabumi ngaharepkeun, ku dicalagarakeunnana Déklarasi Kampanyeu Répéh-Rapih téh, prosés palaksanaan kampanyeu Pilkada Wali Kota katut Wakil Wali Kota Sukabumi Taun 2018, bisa lumangsung hadé jeung lancar, sarta aman, tartib jeung répéh-rapih, luyu jeung harepan sakumna pihak. Tah kuayana éta hal téh, kaayaan wewengkon Kota Sukabumi anu aman, tartib, ayem, tengtrem jeung répéh-rapih salila prosés palaksanaan kampanyeu Pilkada Wali Kota katut Wakil Wali Kota Sukabumi téh bisa dijaga jeung dipiara sacara hadé, anu pamustungannana rupa-rupa kagiatan jeung kahirupan warga masarakat Kota Sukabumi, bisa dilaksanakeun sacara hadé jeung lugsung-langsar.

Sedengkeun Ketua KPU Kota Sukabumi, Hamzah, S.Ag.  ngajelaskeun, dicalagarakeunnana Déklarasi Kampanyeu Répéh-Rapih nguriling Kota Sukabumi téh, sabagé sala sahiji média komunikasi jeung pikeun ngawanohkeun, malah mandar sakumna lapisan warga masarakat Kota Sukabumi hususna anu geus ngabogaan hak pilih apal jeung wanoh ka 4 Paslon Wali Kota katut Wakil Wali Kota Sukabumi anu milu Pilkada Kota Sukabumi Taun 2018.