SATIAP ASN DILARANG JADI PARTISAN PASLON WALI KOTA KATUT WAKIL WALIKOTA SUKABUMI TINANGTU

Reporter : ENDANG SUMARDI

Wali Kota Sukabumi, H. Mohamad Muraz, S.H., M.M., pikeun sababaraha kalina nandeskeun, satiap ASN (Aparatur Sipil Nagara) di lingkungan Pamaréntah Kota Sukabumi, dilarang jadi partisan Paslon (Pasangan Calon) Wali Kota katut Wakil Walikota Sukabumi sarta Paslon Gubernur katut Wakil Gubernur Jawa Barat tinangtu, anu milu Pilkada (Pamilihan Kapala Daérah) Kota Sukabumi jeung Propinsi Jawa Barat Periodeu Taun 2018-2023. Salian ti éta, ogé dilarang ngarojong jeung ngagunakeun atribut Parpol (Partéy Politik) tinangtu, dina mangsa kampanyeu Paslon Wali Kota katut Wakil Walikota Sukabumi sarta Paslon Gubernur katut Wakil Gubernur Jawa Barat.

Salajuna ditandeskeun, luyu jeung nétralitas birokrasi, satiap ASN kudu ajeg nangtung di luhur sakumna golongan jeung Parpol, sarta méré palayanan jeung ngabantu panyalagaraan Pilkada Kota Sukabumi jeung Propinsi Jawa Barat Taun 2018 anu aman, tartib, jujur jeung adil, kalayan kudu tetep teger nangtung méré palayanan publik anu sahadé-hadéna ka sakumna warga masarakat dina sagala widang, tanpa ngabéda-bédakeun agama, suku jeung aliran pulitik tinangtu.

Ěta panandesan Wali Kota Sukabumi téh, ditepikeun ku PLT (Palaksana Tugas) Sekertaris Daérah Kota Sukabumi salaku Inspéktur Upacara, Drs. H. Saléh Makbullah, M.Si., dina Upacara Pangibaran Bendéra Nagara Sang Mérah Putih Poé Kasadaran Nasional Tingkat Kota Sukabumi, tanggal 19 Pébruari 2018, di Buruan Upacara Setda Kota Sukabumi.

Sedengkeun nu jadi Perwira Upacara, PLT Kapala Bagian Humas (Hubungan Masarakat) jeung Protokol Setda Kota Sukabumi, Bénny Mustari, S.Pd., S.IP., M.Si., Komandan Upacara, Diwan Permana, S.STP., Nu Maca Naskah Pancasila, Inspéktur Upacara, Nu Maca Naskah Pembukaan Undang-Undang Dasar 1945, Séno Djulian Saputra, S.IP., Nu Maca Panca Prasetya Korpri, Fauzi Akbar, S.Ě., Pangibar Bendéra, Muhammad Ilham, Farhan Samudra Putra jeung Andréan Jan Pranajaya, sarta Satuan Musik, Gema Swara Korpri Kota Sukabumi.

Hadir dina kasempetan éta, Unsur FKPD (Forum Koordinasi Pingpinan Daérah) Kota Sukabumi, Pingpinan katut Anggota DPRD Kota Sukabumi, Ketua TP PKK Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah) katut Instansi Vértikal, para Camat jeung Lurah, para Alim Ulama katut Inohong Masarakat, para Pingpinan Organisasi Wanoja jeung Pamuda, sarta para tamu ondangan séjénna.