KODIM 0607 KOTA SUKABUMI GEUS NYALAGARAKEUN SILATURAHMI JEUNG PARA ALIM ULAMA

Reporter : ENDANG SUMARDI

Kodim 0607 Kota Sukabumi, geus nyalagarakeun silaturahmi jeung para Alim Ulama katut komponén masarakat Kota jeung Kabupatén Sukabumi, cindekna tanggal 1 Maret 2018, di Kodim 0607 Kota Sukabumi, anu ngangkat téma, Ngaliwatan Kagiatan Silaturahmi jeung para Alim Ulama katut komponén masarakat Kota jeung Kabupatén Sukabumi di Wilayah Kodim 0607 Kota Sukabumi, Urang Ronjatkeun Kamanunggalan TNI-Rahayat jeung Wawasan Kabangsaan, dina raraga Nguatan Pasatuan jeung Kasatuan Bangsa sarta Kautuhan NKRI (Nagara Kasatuan Républik Indonésia). Hadir dina kasempetan éta, Wali Kota Sukabumi, H. Mohamad Muraz, S.H., M.M., Unsur FKPD (Forum Komunikasi Pingpinan Daérah) Kota Sukabumi, para Kapala OPD (Organisasi Parangkat Daérah) jeung instansi nu aya kaitannana, sarta para tamu ondangan séjénna.

Dina kasempetan éta, Wali Kota Sukabumi, H. Mohamad Muraz, S.H., M.M. ngajelaskeun, kaayaan Kota Sukabumi anyar-anyar ieu digeunjleungkeun ku remen muncul jeung sumebarna hoax atawa béwara anu teu bener, hususna ngeunaan ODGJ (Orang Dengan Gangguan Jiwa) anu nyerang sajumlah Alim Ulama di sababaraha Pondok Pasantrén. Tah kulantaran kitu, Wali Kota Sukabumi meredih ka sakumna lapisan warga masarakat, saupama nempo aya ODGJ anu kukulamprengan di wewengkon Kota Sukabumi, sangkan sagancangna dilaporkeun ka Satpol PP (Satuan Polisi Pamong Praja) atawa ka Polres Sukabumi Kota, pikeun sagancangna diamankeun jeung ditartibkeun.

Disagigireun ti éta, Wali Kota Sukabumi nandeskeun, Pamaréntah Kota Sukabumi salawasna maréntah ka sakumna OPD nu aya kaitannana, sangkan salawasna ngamankeun jeung nartibkeun ODGJ kaasup Andar-Andar jeung nu Ngusapir sarta Anak Jalanan di Kota Sukabumi, pikeun nyiptakeun jeung ngaronjatkeun kaamanan, katartiban jeung kaayeman warga masarakat.

Sedengkeun Dandim 0607 Kota Sukabumi, Létkol Inf. Mohammad Mahfud As’at, S.IP. ngajelaskeun, kamekaran Médsos (Média Sosial), anyar-anyar ieu remen nyebarkeun hoax. Tah ku sabab kitu, Dandim 0607 Kota Sukabumi meredih ka sakumna lapisan warga masarakat, sangkan teu gampang narima hoax atawa béwara anu can jelas bener henteuna. Salian ti éta, ogé sangkan wijaksana dina ngagunakeun médsos, sakaligus nyaring rupa-rupa béwara, utamana béwara anu teu bisa ditanggungjawabkeun bener henteuna.

Salajuna dijelaskeun, Kodim 0607 Kota Sukabumi gawé bareng jeung pihak kapulisian anu geus ngabogaan cyber patroli, pikeun nyukcruk satiap hoax anu muncul jeung nyebar di médsos. Tah kuayana éta hal téh, saupama aya postingan anu teu luyu jeung ngageunjleungkeun warga masarakat, Pasi Intél Kodim 0607 Kota Sukabumi baris sagancangna ngadatangan admin atawa nu boga éta akun, pikeun diamankeun jeung dipénta pananggungjawabannana. Leuwih jauh Dandim 0607 Kota Sukabumi ngajelaskeun, tina 20 béwara kajadian anu diunggah ka médsos, ngan ukur aya 2 béwara kajadian anu bener-bener riil kajadiannana. Sedengkeun 18 béwara kajadian, ngan ukur ngarupakeun hoax atawa béwara anu teu bener.