DÉKRANASDA KOTA SUKABUMI GEUS NYALAGARAKEUN FÉSTIVAL KULINÉR KA 2 KOTA SUKABUMI TAUN 2018

Reporter : ENDANG SUMARDI

Dékranasda (Déwan Karajinan Nasional Daérah) Kota Sukabumi, geus nyalagarakeun Féstival Kulinér Ka 2 Kota Sukabumi Taun 2018, nya éta salila 3 poé, cindekna ti tanggal 8 nepi ka tanggal 11 Maret 2018, di Wisma Bhayangkara Kota Sukabumi, sarta dibuka sacara resmi ku Wali Kota Sukabumi, H. Mohamad Muraz, S.H., M.M. Hadir dina kasempetan éta, Unsur FKPD (Forum Komunikasi Pingpinan Daérah) Kota Sukabumi, para Kapala OPD (Organisasi Parangkat Daérah) jeung instansi nu aya kaitannana, sarta para tamu ondangan séjénna.

Wali Kota Sukabumi dina biantarana ngajelaskeun, Kota Sukabumi kudu siap nyanghareupan taun 2019 nu bakal datang. Tah kulantaran kitu, para palaku usaha kadaharan di Kota Sukabumi kudu siap jeung kudu terus nyiptakeun inovasi, sarta warga masarakat Kota Sukabumi kudu bisa milih kadaharan, supaya bisa nyingkahan kadaharan anu teu séhat. Salian ti éta, Dines Kaséhatan Kota Sukabumi katut instansi jeung lembaga nu aya kaitannana, sangkan bisa nyegah sumebarna kadaharan anu teu séhat di Kota Sukabumi. Sabab produk kulinér Sukabumi saperti pais, combro jeung kiripik geus kakoncara, sarta réa kadaharan tradisional jadi kadaharan modern. Tah kusabab kitu, para palaku usaha kadaharan di Kota Sukabumi, kudu terus dirojong jeung didorong sakaligus dimotivasi ku samua pihak, hususna ku OPD sarta instansi jeung lembaga nu aya kaitannana, malh mandar bisa nyiptakeun inovasi dina ngaronjatkeun jeung ngamekarkeun produk kadaharannana.

Sedengkeun Ketua Dékranasda Kota Sukabumi, Hj. Ěsih Setiasih Muraz, S.Ě. ngajelaskeun, dicalagarakeunnana Féstival Kulinér Ka 2 Kota Sukabumi Taun 2018 ieu téh, dina raraga mapag sakaligus ngareuah-reuah pangéling-ngéling poé jadi ka 104 Kota Sukabumi, cindekna tanggal 1 April 2018 nu bakal datang. Lian ti éta, ogé dina raraga usaha ngagali poténsi UMKM (Usaha Mikro Kecil jeung Menengah) di Kota Sukabumi, hususna anu bagerak dina widang karajinan jeung kadaharan. Lantaran Sukabumi geus kakoncara produk kadaharannana.

Salajuna Pupuhu Panata Calagara Féstival Kulinér Ka 2 Kota Sukabumi Taun 2018, Manurung ngajelaskeun, sala sahiji indikator dina ngaronjatkeun ajén SDM (Sumber Daya Manusa), nya éta kudu dirojong ku kadaharan anu séhat jeung anu gizian. Tah kulantaran kitu, dina ieu Féstival Kulinér téh dilaksanakeun panyuluhan jajanan kadaharan anu séhat jeung anu gizian pikeun budah TK, PAUD jeung SD, katut para Guru TK jeung PAUD, sarta ibu-ibu anu ngabogaan balita. Lantaran éta barudak téh kudu diatik, hususna ngeunaan cara milih kadaharan anu séhat jeung anu gizian, sarta bisa nyingkahan kadaharan anu kakontaminasi jeung kadaharan anu ngandung bahan bahaya boraks. Saterusna dijelaskeun, Féstival Kulinér ieu téh, dieusi ku rupa-rupa kagiatan, anu ngawengku bazaar, paméran, palombaan, démo jeung training, sarta pekan kolaborasi kulinér, seni budaya jeung ékonomi kréatif.