PAMARÉNTAH KOTA SUKABUMI BARIS NYALAGARAKEUN PAWÉY SENI BUDAYA KOTA SUKABUMI TAUN 2018

Reporter : ENDANG SUMARDI

Dina raraga mapag sakaligus ngareuah-reuah Pangéling-ngéling Ka 104 Poé Jadi Kota Sukabumi cindekna tanggal 1 April 2018 nu bakal datang, Pamaréntah Kota Sukabumi ngaliwatan Disporapar (Dines Kapamudaan, Olahraga jeung Pariwisata) Kota Sukabumi, baris nyalagarakeun Pawéy Seni Budaya Kota Sukabumi Taun 2018. Kapala Disporapar Kota Sukabumi, H. Adang Taufik, S.H., M.Si. ngajelaskeun, Pawéy Seni Budaya anu baris dilaksanakeun dina tanggal 29 Maret 2018, ti pukul 09.00 WIB nepi ka réngsé téh, nurutkeun rarancang baris diiluan ku 18 kota jeung kabupatén sa Jawa Barat, sarta 7 kacamatan sa Kota Sukabumi.

Anapon éta pawéy téh, baris dilepas sacara resmi di Lapangan Merdéka Kota Sukabumi, sarta baris ditarima sakaligus dibuka sacara resmi ku Walikota Sukabumi, di Panggung Kahormatan, Jalan R. Syamsudin, S.H. Kota Sukabumi, cindekna di hareupeun Balé Kota Sukabumi. Sedengkeun ruteu éta pawé téh, nya éta start ti Lapangan Merdéka Kota Sukabumi, salajuna asup ka Jalan Perintis Kemerdekaan, Jalan R.E. Martadinata, Jalan Siliwangi, jeung finish di Jalan R. Syamsudin, S.H. Kota Sukabumi, sanggus ngaliwatan Panggung Kahormatan.

Saterusna para pajabat anu baris hadir dina kagiatan éta pawéy téh, nya éta Pingpinan katut Anggota DPRD Kota Sukabumi, Kapala Setukpa Lemdiklat Polri Sukabumi, unsur FKPD (Forum Koordinasi Pingpinan Daérah) Kota Sukabumi, PLT (Palaksana Tugas) Sekertaris Daérah Kota Sukabumi, Ketua TP PKK katut Ketua DWP (Dharma Wanita Pasatuan) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah) katut Instansi Vértikal, para Pingpinan BUMN jeung BUMD, para Camat jeung Lurah, Alim Ulama, Inohong Masarakat, Budayawan jeung Seniman, Pimpinan Organisasi Sosial, Kamasarakatan, Wanoja jeung Pamuda, sarta para tamu ondangan séjénna.

Kapala Disporapar Kota Sukabumi ngajéntrékeun, dilaksanakeunnana éta pawéy téh, sabagé sala sahiji wujud nyata pahatian jeung kapadulian Pamaréntah Kota Sukabumi, pikeun ngaraksa jeung ngariksa sakaligus ngalestarikeun, ngaronjatkeun jeung ngamekarkeun rupa-rupa seni budaya di Jawa Barat, hususna di Kota Sukabumi. Lantara éta hal téh, ngarupakeun pancén jeung tanggung jawab sakumna pihak, nya éta pamaréntah jeung warga masarakat, hususna para Budayawan jeung Seniman.