WARGA MASARAKAT ANU RÉK NYIEUN DOKUMÉN KAPADUMUKAN SANGKAN TEU NGAGUNAKEUN PIHAK KATILU

Reporter : ENDANG SUMARDI

Wali Kota Sukabumi, H. Mohamad Muraz, S.H., M.M., cumeluk sakaligus meredih ka sakumna warga masarakat Kota Sukabumi anu rék nyieun dokumén kapadumukan, boh KK (Kartuh Kulawarga) jeung é-KTP (Kartuh Tanda Padumuk éléktronik) boh nu séjénna, sangkan teu ngagunakeun pihak katilu atawa calo. Maksud jeung tujuannana, supaya taya kajadian prakték Pungli (Pungutan Liar). Lantaran nyieun dokumén kapadumukan di Disdukcapil (Dines Kapadumukan jeung Panyatetan Sipil) Kota Sukabumi téh, teu dipulut waragad alias haratis.

Tah kulantaran kitu, satiap warga masarakat anu rék nyieun dokumén kapadumukan, sangkan datang langsung ka Disdukcapil Kota Sukabumi, sarta kudu nurut kana prosedur anu ditetepkeun, dina mangsa nyieun dokumén kapadumukan. Salajuna ditandeskeun, sakumna palayanan nyieun dokumén kapadumukan di Disdukcapil Kota Sukabumi, bébas tina rupa-rupa waragad. Disagigireun ti éta, palayanannana ogé singget pisan, teu nepi ka méakeun waktu sapoé, gumantung kana pasaratannana, naha geus kumplit atawa acan?

Saterusna ditandeskeun, saupama aya palanggaran saperti pungli di lapangan, warga masarakat sangkan ngalaporkeun ka aparat kapulisian, atawa ka Tim Saber Pungli (Sapu Bersih Pungutan Liar) Kota Sukabumi, anu ngawengku Inspéktorat Kota Sukabumi, Polres Sukabumi Kota, jeung Kajaksaan Negri Sukabumi, pikeun sagancangna ditandaklaju jeung diprosés, luyu jeung katangtuan aturan katut undang-undang anu geus ditetepkeun.

Lian ti éta ogé ditandeskeun, di Disdukcapil Kota Sukabumi nepi ka danget ieu teu pernah aya kajadian palanggaran hususna pungli. Malah dina sawatara waktu ka tukang, Disdukcapil Kota Sukabumi meunang layang pangajén ti KPK (Komisi Pemberantasan Korupsi) RI. Tah ku meunangna éta layang pangajén téh, jadi tolok ukur kinerja Disdukcapil Kota Sukabumi, boh dina segi admintrasi boh dina segi palayanan ka warga masarakat.

Ngan parandéné kitu, Wali Kota Sukabumi cumeluk sakaligus meredih ka sakumna pihak, boh ka sakumna lapisan warga masarakat boh ka OPD (Organisasi Parangkat Daérah) sarta instansi katut lembaga nu aya kaitannana, sangkan salawasna ilubiung sacara aktif nalingakeun, hususna ngeunaan palayanan anu dilaksanakeun ku Disdukcapil Kota Sukabumi jeung SKPD (Satuan Kerja Parangkat Daérah) séjénna di Kota Sukabumi.

Anapon usaha pikeun nyingkahan ayana praték calo jeung pungli di Disdukcapil Kota Sukabumi, pihak éta dines téh terus usaha satékah polah ngaronjatkeun jeung ngamekarkeun program Si Jempol (Siap Jemput Bola) Palayanan Administrasi jeung Nyieun Dokumén Kapadumukan, ka satiap pamukiman warga masarakat, pabrik jeung pasar, sarta ka SMA, SMK jeung MA nu aya di Kota Sukabumi.