SAKUMNA ASN SANGKAN NÉTRAL DINA PILKADA BARENG TAUN 2018

Reporter / Redaktur : ENDANG SUMARDI

Wali Kota Sukabumi, H. Mohamad Muraz, S.H., M.M., nginstruksikeun ka sakumna ASN (Aparatur Sipil Nagara) di lingkungan Pamaréntah Kota Sukabumi, sangkan salawasna nétral dina Pilkada (Pamilihan Kapala Daérah) Bareng Taun 2018, nya éta Pilkada Gubernur katut Wakil Gubernur Jawa Barat sarta Pilkada Wali Kota katut Wakil Wali Kota Sukabumi Pariodeu Taun 2013-2018. Lantaran dina danget ieu, masih lumangsung mangsa kompanyeu éta Pilkada, cindekna tepi ka tanggal 23 Juni 2018 nu bakal datang.

Tah ku sabab kitu, sikep nétral sakumna ASN kudu salawalasna diwujudkeun, sakaligus méré palayanan sacara adil jeung saimbang, sarta kudu bener-bener ngajaga sikep nu gampang disangka ku sabagian jalma sabagé wujud rojongan ka Paslon (Pasangan Calon) Gubernur katut Wakil Gubernur Jawa Barat sarta Paslon Wali Kota katut Wakil Wali Kota Sukabumi tinangtu, saperti méré like atawa emotikon jempol dina postingan Paslon di Médsos (Média Sosial), dipoto jeung Paslon bari ngangkat jumlah ramo leungeun luyu jeung nomor urut Paslon jeung nu séjénna. Atawa dina harti séjén, sakumna ASN kudu bisa nyingkahan sagala rupa kagiatan anu ngabogaan poténsi disalah-hartikeun ku sabagian jalma sabagé rojongan ka Paslon tinangtu.

Salajuna ditandaskeun, saupama aya ASN nu ngareumpak kana éta aturan, baris dieureunkeun saheulaan. Hal éta téh luyu jeung Undang-Undang Nomer 10 Taun 2016 ngeunaan Pilkada, nya éta Bawaslu (Badan Pangawas Pamilu) ngabogaan kawenangan pikeun ngalaporkeun ayana sangkaan palanggaran nétralitas ku ASN, ka KASN (Komisi Aparatur Sipil Nagara) sarta ka KemenPAN RB (Kementrian Pandayagunaan Aparatur Nagara jeung Réformasi Birokrasi) katut ka Kemendagri (Kementrian Dalem Negri), pikeun dieureunkeun saheulaanan.

Ěta instruksi Wali Kota Sukabumi téh, ditepikeun ku PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., basa nepikeun biantara dina Upacara Pangibaran Bendéra Nagara Sang Mérah Putih Poé Kasadaran Nasional Tingkat Kota Sukabumi, cindekna tanggal 19 Maret 2018, di Buruan Apél Setda Kota Sukabumi.

Dina kasempetan éta, Wali Kota Sukabumi ogé ngajelaskeun, nepi ka danget ieu can aya palanggaran Pilkada di Kota Sukabumi, hususna nu aya pakuat-kaitna jeung nétralitas ASN. Lian ti éta, Wali Kota Sukabumi ogé nginstruksikeun ka sakumna ASN di lingkungan Pamaréntah Kota Sukabumi, dina mangsa panyalagaraan pamulutan soara éta Pilkada, nya éta dina tanggal 27 Juni 2018 nu bakal datang, sangkan ngagunakeun hak pilihna, luyu jeung katangtuan aturan katut undang-undangan nu ditetepkeun jeung pilihannana masing-masing.