PANETEPAN STATUS SIAGA DARURAT BENCANA DI KOTA SUKABUMI MASIH LUMANGSUNG

Reporter / Redaktur : ENDANG SUMARDI

Kapala Unsur Palaksana BPBD (Badan Pananggulangan Bencana Daérah) Kota Sukabumi, Drs. Asép Suhéndrawan nandeskeun, panetepan Status Siaga Darurat Bencana Caah jeung Urug di Kota Sukabumi masih lumangsung. Lantaran Bencana Caah jeung Urug masih aya jeung ngancam sajumlah wewengkon kacamatan di Kota Sukabumi, akibat cuaca éktrim hujan badag nu masih ngaguyur wewengkon Kota Sukabumi. Tah kuayana éta hal téh, Kapala Unsur Palaksana BPBD Kota Sukabumi meredih ka sakumna pihak, boh ka sakumna lapisan warga masarakat Kota Sukabumi boh ka sakumna aparat SKPD (Satuan Kerja Parangkat Daérah) sarta instansi jeung lembaga nu aya kaitannana sangkan tetep iatna, pikeun nyingkahan ayana kajadian nu teu dipiharep ku sakumna pihak.

Lian ti éta ogé ditandeskeun, Pamaréntah Kota Sukabumi geus netepkeun Status Siaga Darurat Bencana Caah jeung Urug di Kota Sukabumi, cindekna ti bulan Désémber 2017 nepi ka bulan Maret 2018. Saterusna dijelaskeun, dina tanggal 7 Maret 2018, sababaraha tempat di wewengkon Kota Sukabumi keuna ku bencana. Diantarana Bencana Caah di Kalurahan Jayaraksa Kacamatan Baros, Bencana Urug di Kalurahan Baros Kacamatan Baros jeung di Kalurahan Limus Nunggal Kacamatan Cibeureum, sarta Imah Runtuh di Kalurahan Dayeuhluhur Kacamatan Warudoyong jeung Kahuruan di Kalurahan Cikondang Kacamatan Citamiang, cindekna dina tanggal 11 Maret 2018.

Sedengkeun ti tanggal 1 nepi ka tanggal 11 Maret 2018, di wewengkon Kota Sukabumi geus 13 kali kajadian bencana, anu ngawengku Bencana Caah, Urug, Imah Runtuh jeung Kahuruan, sarta ngabalukarkeun karugian ngahontal Rp. 110 juta. Salajuna dijelaskeun, dumasar kana data di satiap wewengkon nu keuna ku bencana, karugian alatan Bencana Urug di Kalurahan Baros ngahontal Rp. 15 juta, Imah Runtuh di Kalurahan Dayeuhluhur ngahontal Rp. 5 juta, Urug di Kalurahan Limusnunggal ngahontal Rp. 10 juta, sarta Kahuruan di Kalurahan Cikondang ngahontal Rp. 80 juta.

Leuwih jauh Kapala Unsur Palaksana BPBD Kota Sukabumi ngajelaskeun, pihakna salawasna usaha satékah polah ngalaksanakeun koordinasi jeung sakumna SKPD sarta instansi katut lembaga nu aya kaitannana, hususna jeung Dines Pahubungan Kota Sukabumi katut DLH (Dines Lingkungan Hirup) Kota Sukabumi sarta Kacamatan jeung Kalurahan sa Kota Sukabumi, pikeun salawasna nalingakeun ka sajumlah tempat nu gampang keuna ku bencana di wewengkonna masing-masing, utamana di wewengkon Kalurahan Cisarua Kacamatan Cikolé. Lantaran struktur taneuh di éta wewengkon téh gampang robah jeung gampang keuna ku Bencana Urug.

Disagigreun ti éta, Kapala Unsur Palaksana BPBD Kota Sukabumi cumeluk ka sakumna lapisan warga masarakat Kota Sukabumi, hususna nu dumuk di lamping pasir jeung nu dumuk di sapanjang sisi wahangan, sangkan salawasna iatna jeung ati-ati, utamana dina satiap turun hujan badag. Salajuna Kapala Unsur Palaksana BPBD Kota Sukabumi meredih ka sakumna warga masarakat Kota Sukabumi, saupama nempo aya kila-kila nu teu hadé, utamana nu aya kaitannana jeung kajadian bencana, sangkan sagancangna ngungsi ninggalkeun padumukan jeung dilaporkeun ka aparat pamaréntah pang deukeutna, pikeun babarengan diungkulan satékah polah.