PLT SEKERTARIS DAÉRAH KOTA SUKABUMI MINGPIN JARAH ROMBONGAN KA TMP SURYAKENCANA KOTA SUKABUMI

Reporter / Redaktur : ENDANG SUMARDI

PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., mingpin Jarah Rombongan ka TMP (Taman Makam Pahlawan) Suryakencana Kota Sukabumi, cindekna tanggal 28 Maret 2018, dina raraga miéling Poé Jadi Ka 104 Taun Kota Sukabumi, 1 April 2018. Anapon nu Mawa Krans Kembang, Satpol PP (Satuan Polisi Pamong Praja) Kota Sukabumi, jeung Satuan Musik, Gema Swara Korpri Kota Sukabumi.

Sedengkeun pamilon éta jarah téh, ngawengku Pingpinan katut Anggota DPRD Kota Sukabumi, unsur FKPD (Forum Koordinasi Pingpinan Daérah) Kota Sukabumi, Gabungan Perwira TNI jeung Polri, para Asistén Daérah Setda Kota Sukabumi, para Kapala OPD (Organisasi Parangkat Daérah) jeung Instansi Vértikal, sarta para Camat jeung Lurah. Saterusna Setukpa Lemdiklat Polri Sukabumi, Kodim 0607 Kota Sukabumi, Yonif 310 Kidang Kancana, Yon Arméd 13 Nanggala Kostrad jeung Polres Sukabumi Kota, sarta Gabungan Korpri Kota Sukabumi, PGRI, Dines Pahubungan, para Guru, OKP jeung Pramuka, katut Mahasiswa jeung Palajar.

Salajuna runtuyan acara éta jarah téh, ngawengku Panghormatan Ka Arwah Para Pahlawan. Ngaheningkeun Cipta. Nunda Krans Kembang, Pamacaan Doa. jeung Panghormatan Pamungkas ka Arwah Para Pahlawan, diteruskeun Ngawurkeun Kembang ka Makam para Pahlawan ku Pingpinan Jarah, Perwira Jarah, Pingpinan katut Anggota DPRD Kota Sukabumi, unsur FKPD (Forum Koordinasi Pimpinan Daerah) Kota Sukabumi, para Asistén Daérah Setda Kota Sukabumi, Ketua TP PKK Kota Sukabumi, Ketua DWP (Dharma Wanita Pasatuan) Kota Sukabumi, Ketua Persit (Pasatuan Istri Prajurit) Kartika Chandra Kirana Kodim 0607 Kota Sukabumi, Ketua Bhayangkari Polres Sukabumi Kota, Dan Yonif 310 Kidang Kancana, sarta Dan Yon Armed 13 Nanggala Kostrad. Saréngséna Jarah jeung Ngawurkeun Kembang ka TMP Suryakencana Kota Sukabumi. diteruskeun Jarah jeung Ngawurkeun Kembang ka Makam Walikota Sukabumi Munggaran, R. Syamsudin, S.H., di TPU (Tempat Pamakaman Umum) Ciandam.

Dina kasempetan éta, PLT Sekertaris Daérah Kota Sukabumi, Drs. H. Saléh Makbullah, M.Si. ngajelaskeun, maksud jeung tujuan dilaksanakeunnana Jarah jeung Ngawurkeun Kembang ieu téh, nya éta pikeun miéling sakaligus ngahormat arwah para pahlawan, kana sagala rupa pajoangan katut pangorbanannana ka nusa jeung bangsa, hususna dina ngamerdékakeun bangsa jeung nagara Indonésia tina leungeun para panjajah, kaasup dina ngabentuk jeung ngadegkeun Pamaréntahan Kota Sukabumi, nya éta ti saprak dibentuk jeung diadegkeunnana Gemeente Sukabumi tanggal 1 April 1914 anu geus kalarung.