P2RW PAMARÉNTAH KOTA SUKABUMI GEUS LUMANGSUNG JEUNG MEKAR KALAYAN HADÉ

Reporter :  ARIF HIDAYAT

Redaktur : ENDANG SUMARDI

Wali Kota Sukabumi, H. Mohamad Muraz, S.H., M.M. nandeskeun, P2RW (Program Pangbardayaan Rukun Warga) Pamaréntah Kota Sukabumi, geus lumangsung jeung mekar kalayan hadé. Panandesan Wali Kota Sukabumi éta téh, ditepikeun dina biantara basa ngalaksanakeun Launching P2RW Taun 2018 sarta audénsi jeung Ketua RW katut Ketua RT sa Kota Sukabumi, sakaligus pamasrahan sacara simbolis waragad P2RW Taun 2018, cindekna tanggal 26 Maret 2018, di GOR (Galanggang Olah Raga) Suryakencana Kota Sukabumi.

Anapon gedéna waragad P2RW taun 2018 téh, nya éta Rp. 20.000.000,00 pikeun satiap RW, atawa ngarandapan undak gedéna Rp. 3.000.000,00 ti taun 2017 anu gedéna Rp. 17.000.000,00 pikeun satiap RW. Salajuna ditandeskeun, ayana paningkatan waragad P2RW ieu téh, lantaran APBD (Anggaran Pandapatan jeung Balanja Daérah) Kota Sukabumi ngarandapan undak. Salian ti éta, ieu P2RW téh bisa ngaronjatkeun ilubiungna warga masarakat dina pangwangunan di satiap RW di Kota Sukabumi.

Disagigireun ti éta ogé ditandeskeun, P2RW téh ngarupakeun program anu pamungkas pikeun Wali Kota Sukabumi Pariodeu Taun 2013-2018, lantaran dina tanggal 13 Méi 2018 nu bakal datang baris mungkas mangsa jabatan jeung pangabdian sabagé Wali Kota Sukabumi. Tah ku lantaran kitu, Wali Kota Sukabumi ngahaturkeun nuhun katut pangajén anu saluhur-luhurna ka sakumna Ketua sarta Pangurus RW jeung RT sa Kota Sukabumi, anu geus usaha satékah polah ngalaksanakeun éta program sacara hadé jeung optimal.

Saterusna Wali Kota Sukabumi ngajelaskeun, salila nyangking kalungguhan jeung ngabdikeun diri sabagé Wali Kota Sukabumi Pariodeu Taun 2013-2018, réa prestasi anu geus kahontal, diantarana pangwangunan doublé trék atawa jalur ganda lintasan Karéta Api jurusan Sukabumi-Bogor jeung pangwangun Jalan Tol Bocimi (Bogor-Ciawi-Sukabumi). Lian ti éta, ogé hasil ngarobah jeung ngaronjatkeun darajat kahirupan warga masarakat Kota Sukabumi ka nu leuwih hadé deui. diantarana ngaliwatan palayanan dasar kaséhatan jeung atikan sarta tumuwuhna ékonomi di Kota Sukabumi, utamana dina taun 2018 atawa dina Ahir Taun Mangsa Jabatan Wali Kota Sukabumi Pariodeu Taun 2013-2018, nya éta ngahontal 5,43 peresén.

Sedengkeun Asistén Pamaréntahan Setda Kota Sukabumi, Drs. H. Andri Setiawan, M.M. ngajelaskeun, waragad P2RW Pamaréntah Kota Sukabumi Taun 2018 téh, dipasrahkeun ka 355 RW sa Kota Sukabumi anu gedéna ngahontal Rp. 7.100.000.000,00, atawa masing-masing RW gedéna Rp. 20.000.000,00, ditambah réward pikeun juara 1 jeung 2 palaksana P2RW Tingkat Kalurahan jeung Tingkat Kacamatan sarta juara 1, 2 jeung 3 Tingkat Kota Sukabumi Taun 2017 gedéna Rp. 247.500.000,00. Tah ku lantaran kitu, total waragad P2RW Pamaréntah Kota Sukabumi Taun 2018 téh ngahontal Rp. 7.347.500.000,00.