PAMARÉNTAH KOTA SUKABUMI GEUS NYALAGARAKEUN PAWÉY SENI BUDAYA KOTA SUKABUMI TAUN 2018

Reporter / Redaktur : ENDANG SUMARDI

Pamaréntah Kota Sukabumi ngaliwatan Disporapar (Dines Kapamudaan, Olahraga jeung Pariwisata) Kota Sukabumi, geus nyalagarakeun Pawéy Seni Budaya Kota Sukabumi Taun 2018, cindekna tanggal 29 Maret 2018, anu diiluan ku 15 kota jeung kabupatén sa Jawa Barat sarta 7 kacamatan sa Kota Sukabumi. Anapon ka 18 kota jeung kabupaten téh, nya éta Kabupatén Ciamis, Kabupatén Sukabumi, Kabupatén Bandung Barat, Kota Cimahi, Kabupatén Karawang, Kabupatén Subang, Kabupatén Tasikmalaya, Kota Bogor, Kabupatén Sumedang, Kabupatén Bekasi, Kabupatén Bogor, Kota Bekasi, Kota Bandung, Kabuptén Garut jeung Kabupatén Indramayu. Sedengkeun 7 kacamatan sa Kota Sukabumi, ngawengku Kacamatan Lembursitu, Baros, Cibeureum, Citamiang, Cikolé, Warudoyong jeung Kacamatan Gunungpuyuh.

Ěta kagiatan téh dilepas sacara resmi ku PLT (Palaksana Tugas) Sekertaris Daérah Kota Sukabumi, Drs. H. Saléh Makbullah, M.Si., di Lapangan Merdéka Kota Sukabumi, sarta ditarima sacara resmi ku Wali Kota Sukabumi, H. Mohamad Muraz, S.H., M.M., di Panggung Kahormatan, Jalan R. Syamsudin, S.H. cindekna di hareupeun Balé Kota Sukabumi, anu dimimitian ku pagelaran Tari Ngahandaruan ti Sanggar Seni Catrik Palagan Kota Sukabumi, sarta Laporan Kapala Disporapar Kota Sukabumi, H. Adang Taufik, S.H., M.Si. salaku Pupuhu Panata Calagara, jeung Laporan Komandan Pawéy Seni Budaya.

Hadir dina kasempetan éta, para pangagung ti Pamaréntah Propinsi Jawa Barat, Kapala Setukpa Lemdiklat Polri Sukabumi, Ketua katut Anggota DPRD Kota Sukabumi, unsur FKPD (Forum Koordinasi Pingpinan Daérah) Kota Sukabumi, Ketua TP PKK Kota Sukabumi, Ketua DWP (Dharma Wanita Pasatuan) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah) jeung Instansi Vértikal, para Camat jeung Lurah, Alim Ulama, Inohong Masarakat, Pingpinan Organisasi Sosial, Kamasarakatan, Pamuda jeung Wanoja, sarta para tamu ondangan lianna.

Wali Kota Sukabumi, H. Mohamad Muraz, S.H., M.M., dina biantarana ngahaturkeun nuhun ka sakumna réngréngan panata calagara katut sakumna pamilon Pawéy Seni Budaya sa Jawa Barat sarta Kacamatan sa Kota Sukabumi. Lian ti éta, Wali Kota Sukabumi ogé ngaharepkeun, ku dilaksanakeunnana Pawéy Seni Budaya ieu téh, bisa ngawanohkeun jeung nyebarlegakeun sakaligus ngalestarikeun jeung ngamekarkeun Seni Budaya Lokal di Jawa Barat, hususna di Kota Sukabumi.

Sedengkeun Kapala Disporapar Kota Sukabumi, H. Adang Taufik, S.H., M.Si. ngajelaskeun, dilaksanakeunnana Pawéy Seni Budaya sa Jawa Barat jeung 7 kacamatan sa Kota Sukabumi téh, dina raraga mapag sakaligus ngareuah-reuah milang kala Poé Jadi Ka 104 Taun Kota Sukabumi, 1 April 2018. Disagigireun ti éta, ogé sabagé sala sahiji wujud nyata pahatian jeung kapadulian Pamaréntah Kota Sukabumi, pikeun miara jeung ngalestarikeun rupa-rupa jenis seni budaya lokal di Jawa Barat, sakaligus ngaronjatkeun jeung ngamekarkeun kapariwisataan, hususna di Kota Sukabumi umumna di Jawa Barat.

Anapon juara kahiji éta pawéy téh, nya éta Kabupatén Bandung Barat, juara kadua Kabupatén Indramayu, juara katiga Kota Bogor, jeung juara harepan Kabupatén Garut. Salajuna juara kahiji kacamatan nya éta Kacamatan Citamiang, juara kadua Kacamatan Cikolé, juara katiga Kacamatan Gunungpuyuh, jeung juara harepan Kacamatan Baros.