PDAM TBW KOTA SUKABUMI NYALAGARAKEUN SOSIALISASI PERMENDAGRI RI NOMER 71 TAUN 2016

Reporter : RIKSAN SATYAPRAWIRA

Redaktur : ENDANG SUMARDI

PDAM TBW (Pausahaan Daérah Air Minum Tirta Bumi Wibawa) Kota Sukabumi, poé Jumaah, 6 April 2018, di Aula UMMI (Universitas Muhammadiyah Sukabumi), nyalagarakeun Sosialisasi Permendagri (Peraturan Mentri Dalem Negri) RI Nomer 71 Taun 2016, ngeunaan Pangitungan jeung Panetepan Tarip Cai Nginum. Ěta sosialisasi téh ngarupakeun anu kadua kalian. Sabab saméméhna, éta sosialiasi téh geus dilaksanakeun, cindekna dina bulan Désémber 2017 nu geus kaliwat.

Diréktur PDAM TBW Kota Sukabumi, Anton Rachman Suryana, S.Sos., M.AP. ngajelaskeun, ieu sosialisasi téh pikeun ngawujudkeun éta Permendagri, anu nurutkeun rarancangna baris aya kanaékan tarip dasar PDAM dina bulan Méi 2018. Nya éta anu saméméhna Rp. 2.400,00 satiap kibik, nurutkeun rarancangna baris naék jadi Rp. 3.550,00 satiap kibik. Ngan éta rarancang kanaékan téh karék mangrupa usulan ti PDAM TBW Kota Sukabumi, anu didasarkeun kana pangitungan Permendagri RI Nomer 71 Taun 2016. Tapi éta usulan téh kudu disaluyuan heula ku para palanggan jeung para pamangku kapentingan, sarta kudu dijieun berita acara kasaluyuannana. Sabab éta berita acara téh baris dijadikeun lampiran usulan pikeun dijadikeun Kepwal (Keputusan Wali Kota) Sukabumi, ngeunaan tarip dasar PDAM dina bulan Méi 2018.

Diréktur PDAM TBW Kota Sukabumi ogé ngajelaskeun, pasualan anu disanghareupan ku PDAM TBW Kota Sukabumi hususna Widang Téhnik dina danget ieu, diantarana masalah kaleungitan cai anu masih kénéh luhur, nya éta ngahontal leuwih kurang 47 peresén, alatan jaringan pipah ACP anu geus kolot ngaleuwihan umur téhnis leuwih kurang 37 taun, sarta jaringan pipahna aya di bahu jalan anu hésé pisan pikeun dioméannana. Saterusna WM (Water Méter) Palanggan réa nu geus kolot ngaleuwihan umur téhnis, nya éta leuwih ti 5 taun. Sagigireun ti éta, ogé WM Induk réa nu teu jalan, sarta aya sababaraha karuksakan dina Unit Pangolahan, anu ngabalukarkeun pangolahan teu bisa lumangsung lancar, jeung cakupan palayanan masih kénéh handap.

Anapon usaha pikeun nurunkeun kaleungitan cai, diantarana ditempuh ngaliwatan Program Widang Téhnik, nya éta ngaganti WM Palanggan anu geus ngaleuwihan umur téhnis, pangukuran tekenan aliran, stép tést dina mangsa peuting, ngaganti WM Induk di sababaraha titik Sumur Bor, sarta ngaganti jeung ngoméan jaringan pipah distribusi. Salian ti éta, ogé ditempuh ngaliwatan Program Widang Non Téhnik, diantarana ngarotasi Patugas Pamaca WM Palanggan, pamacaan pamakéan cai ngagunakeun kaméra, paneraan WM Palanggan, analisa pikeun tingkat akurasi WM Palanggan, jeung analisa pamakéan cai dihandap 10 metér kibik.