KARUGIAN BENCANA DI KOTA SUKABUMI NAMBAHAN JADI RP. 292 JUTA

Reporter / Redaktur : ENDANG SUMARDI

Kapala Séksi Panyegahan jeung Kasiapsiagaan BPBD (Badan Pananggulangan Bencana Daérah) Kota Sukabumi, Akhmad Zulkarnain, S.Ě. ngungkabkeun, karugian bencana di Kota Sukabumi akibat diguyur hujan badag jeung angin kenceng dina tanggal 4 April 2018 anu geus kaliwat, nambahan jadi Rp. 292 juta, tina saméméhna gedéna Rp. 230 juta.

Nambahannana éta karugian téh, luyu jeung nambahannana data bencana di sajumlah titik. Anapon kajadian bencana hususna tangkal kai anu runtuh téh, saméméhna nya éta di 17 titik ruas jalan di Kota Sukabumi. Diantarana di Jalan Vetéran II, Jalan A. Yani, Jalan Arif Rahman Hakim, Jalan Brawijaya, Jalan Kabandungan, Jalan Suryakencana, Jalan Rumah Sakit Bunut, Jalan Siliwangi, Jalan R. Syamsudin, S.H., Jalan R.Ě. Martadinata jeung Jalan Tipar. Sedengkeun dumasar kana hasil ngadata jeung laporan anyar nu asup ka BPBD Kota Sukabumi, jumlah titik bencana di Kota Sukabumi téh nambahan réana 11 titik. Nya éta di Jalan R. Syamsudin, S.H., Jalan Siliwangi, Jalan R.Ě. Martadinata, Jalan Bhayangkara, Taman Kota Alun-Alun, Taman Kota Lapangan Merdéka, Ramayana jeung Parumahan Nanggeléng. Tah ku lantaran kitu, jumlah titik bencana di Kota Sukabumi akibat ku éta hujan jeung angin téh jadi 28 titik.

Kapala Séksi Panyegahan jeung Kasiapsiagaan BPBD Kota Sukabumi ngajelaskeun, nepi ka danget ieu pihak BPBD Kota Sukabumi terus niténan jeung ngadata ka lapangan sarta nunggu laporan anyar ti warga masarakat, kaasup ti aparat instansi jeung lembaga nu aya kaitannana, hususna ngeunaan pangaruh tina éta bencana. Salajuna dijelaskeun, salian terus niténan jeung ngadata ka lapangan, pihak BPBD Kota Sukabumi ogé méré bantuan ka  warga masarakat anu jadi korban éta bencana. Diantarana méré bantuan terpal ka warga masarakat anu suhunan imahna rusak.

Disagigireun ti éta ogé dijelaskeun, dina nyanghareupan usum ngijih taun 2018, Pamaréntah Kota Sukabumi geus netepkeun status siap siaga bencana, nya éta ti awal bulan Januari 2018 nepi ka bulan Méi 2018 nu bakal datang, ti mimiti bencana kahuruan, taneuh urug, caah jeung nu séjénna. Tah ku ayana éta hal téh, Kapala Séksi Panyegahan jeung Kasiapsiagaan BPBD Kota Sukabumi, cumeluk ka sakumna lapisan warga masarakat kaasup ka para pangamudi kandaraan di Kota Sukabumi, saupama kajadian hujan badag jeung angin kenceng, sangkan teu ngiuhan dina handapeun tangkal kai, tapi kudu néangan tempat anu leuwih aman. Maksud jeung tujuannana, pikeun nyingkahan rupa-rupa hal anu teu diharepkeun ku sakumna pihak, saperti tangkal kai runtuh jeung sajabana.