KAPOLDA JABAR MÉRÉ BANTUAN KA PARA KORBAN BENCANA DI KOTA SUKABUMI

Reporter / Redaktur : ENDANG SUMARDI

Kapolda Jabar, Irjén Pol. Drs. Agung Budi Maryoto, M.Si., saréngséna ngalaksanakeun pangamanan kagiatan Kunker (Kunjungan Kerja) Persidén RI, Ir. H. Joko Widodo di Kabupatén jeung Kota Sukabumi, cindekna tanggal 8 April 2018, langsung ngadongdon jeung méré bantuan ka para korban bencana di Kota Sukabumi, dibarengan ku Kapolres Sukabumi Kota, AKBP Susatyo Purnomo Condro, S.H., S.I.K., M.Si.

Ěta para korban bencana téh, akibat hujan badag jeung angin kenceng, cindekna dina tanggal 4 April 2018 anu geus kaliwat. Lantaran ku éta hujan jeung angin téh, teu saeutik tangkal kai anu runtuh, sarta imah, pasilitas umum jeung kandaraan anu ruksak, kaasup dua urang warga masarakat pasangan salaki-pamajikan anu jadi korban, alatan basa keur narumpak kandaraannana katinggang tangkal kai. Anapon bantuan anu dibikeun ku Kapolda Jabar ka para korban éta bencana téh, nya eta mangrupa cét, semen, duit jeung nu séjénna, cindekna di Masjid Al-Latiéf, Kacamatan Cikolé, Kota Sukabumi.

Dina kasempetan éta Kapolda Jabar ngajelaskeun, dipasrahkeunnana éta bantuan ka para korban bencana di Kota Sukabumi téh, ngarupakeun sala sahiji bentuk pahatian jeung kapadulian sosial kapulisian ka warga masarakat di Kota Sukabumi, hususna anu keuna ku éta bencana. Kapolda Jabar ngaharepkeun, éta bantuan téh aya mangpaatna, hususna dina ngabantu jeung ngénténgkeun kabeurat anu dirandapan ku para korban éta bencana. Lantaran prinsip kapulisian, saupama aya warga masarakat anu ngabutuhkeun bantuan, kudu dibantu luyu jeung kamampuhan anu dipibanda. Salian ti éta, dipasrahkeunnana éta bantuan téh, nya éta dina raraga pikeun silih simbeuh ku kadeudeuh jeung silih eusian, sarta pikeun leuwih mageuhan untunan tali silaturahmi, antara kapulisian jeung warga masarakat Kota Sukabumi. Sabab silaturahmi antara kapulisian jeung warga masarakat téh kudu salawasna diuntun jeung dironjatkeun, hususna dina usaha nyiptakeun jeung ngaronjatkeun kaamanan, katartiban, katengtreman jeung karukunan.

Sedengkeun Wali Kota Sukabumi, H. Mohamad Muraz, S.H., M.M., kalayan asmana pribadi katut kapala daérah sarta pamaréntah jeung warga masarakat Kota Sukabumi, ngahaturkeun nuhun anu saluhur-luhurna ka Kapolda Jabar, anu geus mahatikeun jeung paduli méré bantuan ka para korban bencana di Kota Sukabumi. Disagigireun ti éta,  Wali Kota Sukabumi ngaharepkeun, sangkan pahatian jeung kapadulian sarta bantuan anu dipasrahkeun ku Kapolda Jabar ka para korban bencana di Kota Sukabumi téh, salawasna dijadikeun leuit amal soléh, sarta meunang balesan jeung pahala manglipet-lipet ti Nu Maha Kawasa, Alloh Azza Wa Jalla.