KOTA SUKABUMI JADI SALA SAHIJI KOTA PILOT PROJÉCT PJU DI INDONÉSIA

Reporter / Redaktur : ENDANG SUMARDI

Kota Sukabumi jadi sala sahiji kota pilot projéct atawa proyék pacontoan PJU (Panerangan Jalan Umum) di Indonésia, anu baris meunang bantuan lampu PJU produk Koréa sacara haratis, ti KAPID (Koréa Association Photonics for Industry Development) Koréa Selatan, anu bagerak dina widang rékayasa patali marga jeung téknologi PJU. Pikeun ngawujudkeun éta hal téh, rombongan ti KAPID geus ngadongdon Dines Pahubungan Kota Sukabumi, cindekna tanggal 11 April 2018, sarta ditarima sacara resmi ku Kapala Dines Pahubungan Kota Sukabumi, Abdul Rachman, A.TD.

Dina kasempetan éta, Kapala Dines Pahubungan Kota Sukabumi, ngabagéakeun sacara hadé kana ayana dongdonan jeung rancana ayana bantuan lampu PJU sacara haratis ti KAPID téh. Lantara éta bantuan lampu téh kacida positip jeung gedé pisan mangpaatna pikeun pamaréntah jeung warga masarakat Kota Sukabumi, hususna pikeun ngarojong jeung ngawujudkeun program Kota Sukabumi Caang. Salajuna dijelaskeun, dina ngawujudkeun éta program téh, pihakna baris ngalaksanakeun évaluasi leuwih ti heula jeung milih lampu PJU produk pang hadéna, sarta cocog kaayaan wewengkon Kota Sukabumi. Sabab pihakna ditawaran rupa-rupa jenis jeung produk lampu, ti rupa-rupa pausahaan anu ngagabung ka KAPID. Salian ti éta ogé dijelaskeun, pihakna katut Kapala DLH (Dines Lingkungan Hirup) Kota Sukabumi, Drs. Adil Budiman, M.Si., saméméhna geus ngadongdon ka Koréa, pikeun niténan prosés produksi jeung performancé rupa-rupa jenis lampu PJU di Koréa.

Sedengkeun Pucuk Pingpinan jeung Pangagung KAPID sakaligus Persidén Diréktur PT Via Konét International, Hwang Hwankyu, dina kasempetan éta ngajelaskeun kaunggulan lampu PJU produk pausahaannana, sarta geus diproduksi sacara massal jeung digunakeun di sakabéh wewengkon Koréa Selatan. Malah sababaraha nagara geus ngaimpor éta lampu, sabagai produk standar di sababaraha nagara. Saterusna dijelaskeun, Kota Sukabumi ngarupakeun kota munggaran di Indonésia, anu baris ngagunakeun éta lampu PJU, sakaligus jadi pilot projéct. Lian ti éta ogé dijelaskeun, saupama kualitas produk éta lampu PJU téh diajén hadé jeung cocog dipasang di Kota Sukabumi, lampuna baris sagancangna dikirim sacara haratis.

Saréngséna ditarima sacara resmi, rombongan ti KAPID téh diajak ku Kapala Dines Pahubungan Kota Sukabumi, ka Rohangan TMC (Trafick Manajemen Control) jeung Rohangan CCTV Dines Pahubungan Kota Sukabumi, pikeun niténan titik-titik lampu PJU di Kota Sukabumi ngaliwatan layar télévisi, sakaligus ngalaksanakeun survéy sacara langsung ka lapangan. Sanggeus réngsé ngalaksanakeun survéy ka lapangan jeung présentasi, rombongan ti KAPID téh ngajén, yén produk éta lampu PJU téh cocog pisan dipasang di Kota Sukabumi. Tah ku lantaran kitu, pausahaan éta lampu PJU téh baris sagancangna ngirimkeun lampuna maké peti kemas, husus pikeun dipasang di sakabéh wewengkon Kota Sukabumi.