KAWIJAKAN NERAPKEUN OTDA JADI PILIHAN ANU KACIDA TEPATNA JEUNG RASIONAL

Reporter / Redaktur : ENDANG SUMARDI

Wali Kota Sukabumi, H. Mohamad Muraz, S.H., M.M. nandeskeun, kawijakan nerapkeun Otda (Otonomi Daérah) utamana pikeun kabupatén jeung kota, jadi pilihan anu kacida tepatna jeung rasional. Komo deui dina danget ieu, Nagara Républik Indonésia anu padumukna geus ngahontal 260 juta jiwa sarta dibagi 34 propinsi, 415 kabupatén jeung 93 kota. Tina ratusan pamaréntahan daérah éta téh, tangtuna ngabogaan poténsi daérah, karakteristik jeung sumber daya anu béda-béda.

Tah ku sabab kitu, implementasi Otda téh mutlak kudu dibarengan ku kréatipitas jeung kamampuhan pamaréntah daérah dina ngolah sumber daya anu dipibanda. Sabab kateumampuhan pamaréntah daérah dina ngolah sumber daya, tangtuna ogé baris ngabeungbeuratan anggaran nagara jeung baris mingkin jauh tina tujuan utama Otda, nya éta ngaronjatkeun palayanan publik jeung kasajahtraan masarakat.

Panandesan Wali Kota Sukabumi éta téh, ditepikeun dina upacara pangéling-ngéling tepung taun Otda, anu diranggeuy jeung pangéling-ngéling tepung taun Satpol PP (Satuan Polisi Pamong Praja), Linmas (Palindungan Masarakat) jeung Damkar (Pamadam Kabakaran) Taun 2018 Tingkat Kota Sukabumi, cindekna poé Jumaah isuk, 27 April 2018, di Buruan Apél Setda Kota Sukabumi.

Salajuna ditandeskeun, salila jangka waktu 22 taun, implementasi Otda di Indonésia, réa pakar pamaréntahan jeung Otda anu ngarasa pondok harepan kana kahasilan Otda. Hal éta ditandaan ku teu ngaronjatna séktor palayanan publik jeung masih kénéh réa kapanggih kasus-kasus korupsi di pamaréntahan daérah. Ngan parandéné kitu, pikeun Wali Kota Sukabumi mah ngarasa gedé harepan, yén Otda téh ngarupakeun pilihan pang hadean. Lantaran lokus palayanan publik jadi leuwih deukeut jeung masarakat.

Hadir dina kasempetan éta, Pingpinan katut Anggota DPRD Kota Sukabumi, unsur FKPD (Forum Komunikasi Pingpinan Daérah) Kota Sukabumi, Ketua TP PKK Kota Sukabumi, para Asistén Daérah Setda Kota Sukabumi, para Kapala OPD (Organisasi Perangkat Daerah), para Camat jeung Lurah, para Inohong Masarakat, Pingpinan Organisasi Wanoja jeung Pamuda, sarta para tamu ondangan séjénna.

Saréngséna upacara, diteruskeun pamusnahan barang bukti 219 botol Miras (Minuman Keras) rupa-rupa jenis jeung mérék, hasil Oprasi Praja Wibawa Taun 2018, ku Walikota Sukabumi, Pingpinan DPRD Kota Sukabumi, unsur FKPD Kota Sukabumi, sarta Kapala jeung Anggota Satpol PP Kota Sukabumi.