WEWENGKON KACAMATAN CIKOLÉ KOTA SUKABUMI PALING RAWAN BENCANA

Reporter : ENDANG SUMARDI

Kapala Unsur Palaksana BPBD (Badan Pananggulangan Bencana Daérah) Kota Sukabumi, Drs. Asép Suhéndrawan ngungkabkeun, wewengkon Kacamatan Cikolé Kota Sukabumi paling rawan atawa ngabogaan resiko anu luhur kana ancaman kajadiannana bencana, hususna bencana taneuh urug, tina 7 wewengkon kacamatan nu aya di Kota Sukabumi. Buktina dina data anu kacatet di BPBD Kota Sukabumi, salila taun 2017 nu geus kaliwat, kajadian bencana di wewengkon Kacamatan Cikolé ngahontal 46 kali, anu ngawengku 11 kali kahuruan, 6 kali caah, 20 kali taneuh urug, sakali angin topan jeung 8 kali cuaca éktrim, anu total karugiannana ngahontal Rp. 990.650.000,00. Salian ti éta ogé diungkabkeun, tina 20 kali kajadian bencana taneuh urug di wewengkon Kacamatan Cikolé dina taun 2017 téh, karugiannana ngahontal Rp. 302.000.000,00.

Sedengkeun pikeun wewengkon kacamatan séjénna di Kota Sukabumi kawilang leutik jeung sedeng, atawa teu sarawan jeung saparna saperti di wewengkon Kacamatan Cikolé. Diantarana di wewengkon Kacamatan Cibeureum ngahontal 9 kali kajadian bencana, anu ngawengku 2 kali kahuruan, sakali caah, 6 kali taneuh urug, sakali angin topan, sakali lini jeung 6 kali cuaca ékstrim, sarta total karugiannana ngahontal Rp. 485.000.000,00. Saterusna di wewengkon Kacamatan Baros ngahontal 9 kali kajadian bencana, nya éta 3 kali karuhuan, sakali caah jeung 5 kali cuaca ékstrim, anu karugiannana ngahontal Rp. 194.000.000,00, sarta di wewengkon Kacamatan Lembursitu 14 kali kajadian bencana, anu ngawengku 3 kali kahuruan, 6 kali taneuh urug, sakali angin topan jeung 4 kali cuaca éktrim, kalayan karugiannana ngahontal Rp. 122.000.000,00.

Tah kulantaran kitu, pihak BPBD Kota Sukabumi gawé bareng jeung SKPD (Satuan Kerja Parangkat Daérah) sarta instansi jeung lembaga nu aya kaitannana, salawasna usaha satekah polah ngalaksanakeun panyuluhan jeung sosialisasi ka sakumna lapisan warga masarakat Kota Sukabumi, hususna nu aya kaitannana jeung bencana, saperti caah, taneuh urug jeung bencana séjénna. Maksud jeung tujuannana, supaya sakumna lapisan warga masarakat Kota Sukabumi salawasna iatna, sarta bisa nyingkahan kajadian korban jiwa saupama aya kajadian bencana di wewengkonna séwang-séwangan.

Salajuna Kapala Unsur Palaksana BPBD Kota Sukabumi cumeluk ka sakumna lapisan warga masarakat Kota Sukabumi hususna nu dumuk di sapanjang sisi wahangan jeung di lamping pasir, sangkan dina satiap kajadian turun hujan salawasna iatna jeung ati-ati. Sabab dina satiap kajadian turun hujan utamana anu dibarengan ku angin kenceng, remen kajadian bencana caah jeung taneuh urug, sarta tangkal kai jeung imah runtuh. Lian ti éta, ogé ulah miceun runtah sambarangan, utamana ka susukan jeung wahangan, sabab bisa nimbulkeun bencana caah, lantaran cai susukan jeung wahangan mudal, alatan kapendet ku tumpukan runtah.