PROGRAM #GISA TINGKAT KOTA SUKABUMI GEUS DICANANGKEUN SACARA RESMI

Reporter :  ARIF HIDAYAT

Redaktur : ENDANG SUMARDI

Program #GISA (Gerakan Indonésia Sadar Adminduk) Tingkat Kota Sukabumi, geus dicanangkeun sacara resmi ku Wali Kota Sukabumi, H. Mohamad Muraz, S.H., M.M., dina Rakor (Rapat Koordinasi) Palayanan Panyatetan Akta Kalahiran jeung Dokumén Kapadumukan séjénna, cindekna tanggal 4 Méi 2018, di Gedong Juang 45 Kota Sukabumi.

Ěta kagiatan téh diiluan ku Kapala Disdukcapil (Dines Kapadumukan jeung Panyatetan Sipil) Kota Sukabumi, Iskandar, S.IP., M.T. katut réngréngannana, Kapala Bagian Tapem (Tata Pamaréntahan) Setda Kota Sukabumi, Punjul Saépul Hayat, S.STP., M.Si., para Camat, para Kapala Séksi Pamaréntahan jeung Trantibum (Katengtreman jeung Katartiban Umum) Kalurahan, jeung para Ketua RW sa Kota Sukabumi.

Wali Kota Sukabumi dina biantarana ngajelaskeun, Program #GISA Kemendagri (Kementrian Dalem Negri) Rl ieu téh, perlu ditindak-laju nepi ka sasarannana. Tah ku sabab kitu, Wali Kota Sukabumi cumeluk ka sakumna pihak hususna ka sakumna Lulugu Tartib Adminduk (Administrasi Kapadumukan) di Kota Sukabumi, sangkan ngalaksanakeun sosialisasi ka sakumna lapisan warga masarakat, ngeunaan pentingna ngabogaan dokumén kapadudukan anu datana bener.

Salajuna dijelaskeun, dina Program #GISA téh aya 3 Sadar anu kudu salawasna dipahatikeun ku sakumna pihak. Kahiji Sadar ngeunaan Naon, nya éta Sadar pentingna dokumén kapadumukan, Sadar pentingna data kapadumukan anu bener, Sadar ngamangpaatkeun data kapadumukan, jeung Sadar ngalayanan Adminduk muru masarakat anu bahagia. Kadua Sadar pikeun Saha, nya éta Sadar Masarakatna, Sadar Patugasna, jeung Sadar Lembaga Pangguna Data, sarta Katilu Sadar sakumna Tingkatan, nya éta Sadar Adminduk di Tingkat Désa jeung Kalurahan, Sadar Adminduk di Tingkat Kacamatan, Sadar Adminduk di Tingkat Kabupatén jeung Kota, Sadar Adminduk di Tingkat Propinsi, jeung Sadar Adminduk di Indonésia.

Wali Kota Sukabumi nandeskeun, pikeun ngawujudkeun éta hal téh, réa hal anu kudu dilaksanakeun ku Pamaréntah Kota Sukabumi, anu sacara téhnisna jadi tugas Disdukcapil Kota Sukabumi. Tah ku lantaran kitu, Disdukcapil Kota Sukabumi kudu aktip sarta teu nungguan palayanan di kantor. Diantarana ngaliwatan Program Si Jempol (Siap Jemput Bola) Palayanan Adminduk, anu langsung nepi kana sasaran, sarta ngalaksanakeun sosialisasi jeung panyuluhan kaasup ngalaksanakeun Rakor, sabagé sarana pikeun ngawujudkeun sinergitas, antara Disdukcapil Kota Sukabumi jeung Dines, lnstansi katut Lembaga nu aya pakuat-pakaitna.