WALI KOTA SUKABUMI NGUKUHKEUN PANJABAT SEKDA KOTA SUKABUMI

Reporter / Redaktur : ENDANG SUMARDI

Wali Kota Sukabumi, H. Mohamad Muraz, S.H., M.M., ngukuhkeun PLT (Palaksana Tugas) Sekda (Sekertaris Daérah) Kota Sukabumi, Drs. H. Saléh Makbullah, M.Si., jadi Panjabat Sekda Kota Sukabumi, cindekna tanggal 7 Méi 2018, di Rohangan Pasamoan Setda Kota Sukabumi. Hadir dina kasempetan éta, para Asistén Daérah Setda Kota Sukabumi, para Kapala OPD (Organisasi Parangkat Daérah) jeung instansi vértikal, para Camat jeung Lurah, sarta réngréngan Pangurus DWP (Dharma Wanita Pasatuan) Kota Sukabumi jeung para tamu ondangan séjénna.

Dina biantarana Wali Kota Sukabumi ngajelaskeun, dikukuhkeunnana PLT Sekda Kota Sukabumi jadi Panjabat Sekda Kota Sukabumi ieu téh, nindaklaju terbitna Paraturan Persidén RI Nomer 3 Taun 2018 ngeunaan Panjabat Sekda. Sedengkeun ditetepkeunnana PLT Sekda Kota Sukabumi jeung dikukuhkeunnana Panjabat Sekda Kota Sukabumi téh, pikeun ngeusi kakosongan, lantaran pajabat Sekda Kota Sukabumi saméméhna ngundurkeun diri ti awal bulan Désémber 2017 anu geus kaliwat, sabab miluan Pilkada (Pamilihan Kapala Daérah) Kota Sukabumi Taun 2018.

Wali Kota Sukabumi nandeskeun, Panjabat Sekda Kota Sukabumi téh baris mancén gawé anu kacida beuratna. Sabab Wali Kota katut Wakil Wali Kota Sukabumi Mangsa Bhakti Taun 2013-2018 baris purna bhakti dina bulan Méi 2018 ieu. Tah ku lantaran kitu, Panjabat Sekda Kota Sukabumi téh kudu mancén gawé jeung ngajalankeun tilu fungsi sakaligus. Diantarana kudu ngabogaan sikep jeung nindak sabagé administrator anu jadi pancén jeung kawenangan Sekda, kudu ngabina jeung nalingakeun SDM (Sumber Daya Manusa) anu ngarupakeun Tupoksi (Tugas Poko jeung Fungsi) Wakil Wali Kota, sarta kudu nangtukeun kawijakan jeung kaputusan strategis anu salila ieu dilaksanakeun ku Wali Kota.

Saterusna ditandeskeun, salian ti kudu ngajalankeun pancén katilu fungsi éta téh, Panjabat Sekda Kota Sukabumi ogé kudu bisa ngajaga kondusifitas wewengkon Kota Sukabumi dina palaksanaan Pilkada Taun 2018, sarta kudu bisa nguntun komunikasi jeung sakumna pihak, nya éta jeung lembaga horizontal katut vértikal. Tah ku sabab kitu, Wali Kota Sukabumi ngaharepkeun, sangkan Panjabat Sekda Kota Sukabumi téh bisa ngajalankeun pancén gawé sacara hadé jeung optimal.

Sedengkeun Panjabat Sekda Kota Sukabumi, Drs. H. Saléh Makbullah, M.Si., nandeskeun baris usaha satékah polah jeung ngalaksanakeun pancén gawé anu sahadé-hadéna pikeun Kota Sukabumi, kaasup dina nyukséskeun Pilkada Taun 2018. Salajuna ditandeskeun, réa PR anu kudu dilaksanakeun jeung diréngsékeun, utamana dina mangsa mapag palaksanaan Pilkada Taun 2018, sabab palaksanaan éta Pilkada téh kudu suksés, sarta aman, tengtrem jeung rukun. Salian ti éta, Panjabat Sekda Kota Sukabumi ogé ngahaturkeun nuhun jeung rasa sukur, sabab dipercaya jadi Panjabat Sekda Kota Sukabumi.