DISKOP UKM-PP KOTA SUKABUMI NYALAGARAKEUN PASAR MURAH ROMADHON TAUN 1439 HIJRIYAH

Reporter / Redaktur : ENDANG SUMARDI

Diskop UKM-PP (Dines Koprasi, Usaha Kecil Menengah, Padagangan jeung Paindustrian) Kota Sukabumi, nyalagarakeun Pasar Murah jeung Bazaar Romadhon Taun 1439 Hijriyah, di 7 Kacamatan sa Kota Sukabumi. Kapala Diskop UKM-PP Kota Sukabumi, Drs. Ayép Supriatna, M.M. ngajelaskeun, éta kagiatan téh dijadwalkeun baris lumangsung salila 14 poé, cindekna ti tanggal 22 Méi 2018 nepi ka tanggal 4 Juni 2018, atawa masing-masing kacamatan 2 poé séwang.

Nya éta Kacamatan Baros tanggal 22 jeung 23 Méi 2018, di Buruan Kantor Kacamatan Baros, Kacamatan Cibeureum tanggal 24 jeung 25 Méi 2018, di Buruan Kantor Kacamatan Cibeureum, sarta Kacamatan Lembursitu tanggal 26 jeung 27 Méi 2018, di Buruan Kantor Kacamatan Lembursitu. Saterusna Kacamatan Warudoyong tanggal 28 jeung 29 Méi 2018, di Buruan Kantor Kacamatan Warudoyong, Kacamatan Gunung Puyuh tanggal 30 jeung 31 Méi 2018, di Buruan Kantor Kalurahan Gunung Puyuh, Kacamatan Cikolé tanggal 1 jeung 2 Juni 2018, di Buruan Kantor Kalurahan Cisarua, sarta Kacamatan Citamiang tanggal 3 jeung 4 Juni 2018, di Buruan Kantor Kacamatan Citamiang.

Anapon barang-barang anu dijual dina Pasar Murah jeung Bazaar Romadhon téh, nya éta pikeun setiap pakét hargana Rp. 65 rébu, anu ngawengku 3 kilogram Béas saharga Rp. 21 rébu, sakilogram Gula Pasir Rp. 9 rébu, sakilogram Tipung Tarigu Rp. 5 rébu, sakilogram Suuk meungang meresihan kulitna Rp. 20 rébu, jeung saléter Minyak Goréng dina kemasan Rp. 10 rébu. Salian ti éta, ogé ngajual rupa-rupa jenis inuman jeung kadaharan siap saji has Kota Sukabumi, nya éta kadaharan garing, endog asin, busana muslim jeung barang-barang penting séjénna.

Kapala Diskop UKM-PP Kota Sukabumi nandeskeun, harga barang-barang anu dijual di Pasar Murah jeung Bazaar Romadhon téh kawilang murah pisan, lantaran anu baralanjana meunang potongan harga atawa diskon lantaran meunang subsidi ti pamaréntah. Salajuna ditandeskeun, Pasar Murah jeung Bazaar Romadhon ieu téh, dilaksanakeun sacara rutin satiap taun, di satiap Kacamatan sa Kota Sukabumi, cindekna dina satiap Bulan Romadhon. Anapon maksud jeung tujuannana, nya éta sabagé sala sahiji usaha ngawujudkeun kahayang warga masarakat Kota Sukabumi, sangkan di satiap Kacamatan di Kota Sukabumi dilaksanakeun Pasar Murah jeung Bazaar Romadhon, pikeun ngabantu sakaligus ngahampangkeun kabeurat warga masarakat, hususna warga masarakat anu kurang mampuh jeung anu pangasilannana handap.