POLRES SUKABUMI KOTA NETEPKEUN STATUS SIAGA HIJI

Reporter / Redaktur : ENDANG SUMARDI

Polres Sukabumi Kota netepkeun status siaga hiji, cindekna ti tanggal 13 Méi 2018, nyusul kajadiannana aksi téror di Surabaya, sarta dilumpuhkeunnana opat urang anu diduga téroris di wewengkon Kabupatén Cianjur anu ngontrak imah di wewengkon Kabupatén Sukabumi. Salian ti éta, Polres Sukabumi Kota ogé nurunkeun ratusan personil, anu ditugaskeun di satiap puseur karaméan jeung tempat ibadah nu aya di wilayah hukum Polres Sukabumi Kota.

Sakumaha anu ditandeskeun ku Kapolres Sukabumi Kota, AKBP Susatyo Purnomo Condro, S.H., S.I.K., M.Si., panetepan status siaga hiji jeung éta pangamanan téh kacida pisan diperlukeunnana. Komo deui dina danget ieu muncul isu téroris di wewengkon séjén, sarta perlu sagancangna diungkulan, supaya wilayah hukum Polres Sukabumi Kota bisa jauh tina rupa-rupa hal anu teu diharepkeun ku sakumna pihak.

Saterusna dijelaskeun, Polres Sukabumi Kota geus nurunkeun sajumlah 300 urang personil jeung 400 urang personil Pulisi Romadhon, boh ti Polres boh ti Polsek pikeun ngalaksanakeun KKYD (Kagiatan Kapulisian Yang Ditingkatkan), hususna dina ngalaksanakeun pangamanan di satiap Garéja jeung Masjid nu aya di wilayah hukum Polres Sukabumi Kota. Sabab anu ngaranna aksi kajahatan téh bisa kajadian iraha waé jeung dimana waé.

Disagigireun ti éta ogé dijelaskeun, sabagé aparat pananjeur hukum ngabogaan kawajiban dina ngajaga kaamanan jeung katengtreman warga masarakat, luyu jeung Tupoksi (Tugas Poko jeung Fungsi) Polri. Salajuna dijelaskeun, pikeun nyegah kajadiannana aksi térorismeu, Polres Sukabumi Kota terus ngaronjatkeun jeung ngamekarkeun pangamanan babarengan jeung Kodim 0607 Kota Sukabumi.

Kapolres Sukabumi Kota nandeskeun, réngréngan Polri jeung TNI geus ngalaksanakeun Apél Sinegritas, sabagé wujud konsolidasi para komandan satuan pikeun salawasna ngabogaan komitmen jeung sinergitas dina ngalaksanakeun pancén pangamanan. Saterusna ditandeskeun, ku ayana gawé bareng anu harmonis jeung sakumna élemén, bisa nyikepan jeung ngungkulan rupa-rupa pasualan anu kajadian sacara hadé, hususna antara Polri jeung TNI, sabagé ujung tumbak kaamanan wilayah.

Disagédéngeun ti éta ogé ditandeskeun, ku renungna jeung ngaleuyana isu térorismeu, Polri jeung TNI siap ngalaksanakeun pancén sacara hadé jeung optimal, kaasup waktu, tanaga jeung pikiran, pikeun méré rasa aman jeung ayem ka warga masarakat, ku cara nugaskeun personil di satiap titik karaméan jeung tempat ibadah, pikeun nyiptakeun sakaligus ngaronjatkeun Kamtibmas (Kaamanan jeung Katartiban Masarakat), hususna di wilayah hukum Polres Sukabumi Kota.