BAZNAS KOTA SUKABUMI NGALAKSANAKEUN RAPAT KATULADANAN PINGPINAN DINA MAYAR ZAKAT

Reporter : RIKSAN SATYAPRAWIRA

Redaktur : ENDANG SUMARDI

Bareng jeung panyaluran zakat Persidén katut Wakil Persidén RI, Baznas (Badan Amil Zakat Nasional) Kota Sukabumi ngalaksanakeun Rapat Katuladanan Pingpinan dina mayar zakat, cindekna tanggal 24 Méi 2018, di Rohangan Utama Balé Kota Sukabumi. Ěta rapat téh dihadiran ku Unsur FKPD (Forum Komunikasi Pingpinan Daérah) Kota Sukabumi, Panjabat Sekda (Sekertaris Daérah) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah), Lembaga, Instansi Vértikal jeung BUMD (Badan Usaha Milik Daérah).

Dina kasempetan éta, Panjabat Sekda Kota Sukabumi, Drs. H. Saléh Makbullah, M.Si. ngajelaskeun, dilaksanakeunnana Rapat Katuladanan Pingpinan dina mayar zakat téh, nya éta pikeun ngaronjatkeun panarimaan zakat ti ASN (Aparatur Sipil Nagara) atawa PNS (Pagawé Nagri Sipil) di Kota Sukabumi, anu disalurkeun ka Baznas Kota Sukabumi, dimimitian ku para pingpinannana masing-masing. Tah ku lantaran kitu, Panjabat Sekda Kota Sukabumi, ngaharepkeun sakaligus cumeluk ka satiap Pingpinan OPD, Lembaga, Instansi Vértikal jeung BUMD di Kota Sukabumi, sangkan jadi tuladan jeung sacara rutin nyalurkeun ZIS (Zakat, Infak jeung Shodaqoh) ngaliwatan Baznas Kota Sukabumi, lantaran réa mangpaatna, sala sahijina nya éta pikeun ngabantu warga masarakat anu teu mampuh.

Sedengkeun Ketua Baznas Kota Sukabumi, Ir. H. Fifi Kusumajaya, M.M. dina laporannana ngajelaskeun, nepi ka danget ieu di Kota Sukabumi geus kadaptar 1.000 Muzakki atawa jalma anu wajib mayar zakat. Tina jumlah éta Muzakki téh, diantarana sajumlah 209 urang geus ngabogaan NPWZ (Nomer Poko Wajib Zakat). Saterusna dijelaskeun, dilaksanakeunnana Rapat Katuladanan Pingpinan téh, nya éta pikeun ngaronjatkeun katuladanan Pingpinan OPD, Lembaga, Instansi Vértikal jeung BUMD di Kota Sukabumi dina mayar ZIS ngaliwatan Baznas Kota Sukabumi, pikeun disalurkeun deui ka para mustahik atawa jalma anu ngabogaan hak narima ZIS. Diantarana ngaliwatan program Bapermah (Bantuan Perbaikan Rumah), Bamus (Bantuan Modal Usaha), Tumaritis (Tunjangan Masarakat Kritis), Batama (Bantuan Kaséhatan Ulama), Bagus (Bantuan untuk Guru MD jeung Ustadz), sarta bantuan paket Sembako (Sembilan Bahan Poko) ka warga masarakat miskin, bantuan ka mualap jeung ibnu sabil, bantuan sarana jeung prasarana kaagamaan masjid, majelis talim, madrasah jeung PAUD (Pendidikan Anak Usia Dini), kaasup gawé bareng jeung BPJS (Badan Panyalagara Jaminan Sosial) Kaséhatan, nya éta ngabantu 50 urang disabilitas.

Ěta Rapat Katuladanan Pingpinan téh, dieusi tausiyah ku Wakil Ketua II Widang Pendistribusian jeung Pendayagunaan Baznas Kota Sukabumi, Drs. K.H. Muchtar Ubaédillah. Disagigireun ti éta, ogé dipasrahkeun zakat ti Panjabat Wali Kota Sukabumi, Panjabat Sekda Kota Sukabumi jeung para tamu ondangan lianna ka Baznas Kota Sukabumi, sarta dipasrahkeun NPWZ ti Baznas Kota Sukabumi ka Panjabat Wali Kota Sukabumi, Panjabat Sekda Kota Sukabumi jeung para Asistén Daérah Setda Kota Sukabumi.