PANJABAT WALI KOTA SUKABUMI MASRAHKEUN BANTUAN KA 3.741 URANG LANSIA JEUNG JOMPO

Reporter / Redaktur : ENDANG SUMARDI

Panjabat Wali Kota Sukabumi, Drs. H. Dady Iskandar, M.M., masrahkeun bantuan ka 3.741 urang Lansia jeung Jompo sa Kota Sukabumi gedéna Rp. 276.834.000,00, ti APBD (Anggaran Pandapatan jeung Balanja Daéah) Kota Sukabumi Taun Anggaran 2018. Ěta bantuan téh dipasrahkeun sacara simbolis ka Lurah Cisarua, Wawan Ruswanda, S.Ag., dina kagiatan Tarling (Tarawéh Nguriling) Tim Safari Romadhon Muspida Kota Sukabumi Taun 2018 Puteran Kahiji, cindekna tanggal 21 Méi 2018, di Masjid Jami An-Nawawi, Gang Samsi RT 02 RW 16, Kalurahan Cisarua, Kacamatan Cikolé. Anapon anu nepikeun ceramah dina éta kagiatan téh, nya éta Kapala Kantor Kemenag (Kementrian Agama) Kota Sukabumi, Drs. H. Chalik Mawardi, M.Ag., jeung moderator ti Kantor Kemenag Kota Sukabumi, K.H. Ludi Jalaludin, S.Pdi.

Salian ti éta, Panjabat Wali Kota Sukabumi ogé masrahkeun bantuan sarana kaagamaan, ka Masjid Besar Kacamatan Cikolé gedéna Rp. 6 juta, sarta ka 6 Masjid Jami Kalurahan, anu ngawengku Masjid Jami Kalurahan Selabatu, Kalurahan Cikolé. Kalurahan Gunungparang, Kalurahan Kebonjati, Kalurahan Cisarua jeung Masjid Jami Kalurahan Subangjaya gedéna Rp. 12 juta, atawa masing-masing Masjid Jami Kalurahan gedéna Rp. 2 juta, sarta ka Masjid Jami An-Nawawi gedéna Rp. 1 juta jeung tanda mata ti Panjabat Sekda (Sekeraris Daérah) Kota Sukabumi, Kapala Kantor Kemenag Kota Sukabumi, jeung ti Ketua Baznas (Badan Amil Zakat Nasional) Kota Sukabumi.

Sedengkeun Rombongan Tarling Tim Safari Ramadhan Muspida Kota Sukabumi téh, ngawengku Panjabat Wali Kota Sukabumi, Pingpinan katut Anggota DPRD Kota Sukabumi, unsur Muspida Kota Sukabumi, Panjabat Sekda Kota Sukabumi, para Asistén Daérah Setda Kota Sukabumi, para Kapala OPD jeung Instansi Vértikal, Camat, unsur Muspika jeung Lurah, jajaran Pangurus MUI Kota Sukabumi jeung Kacamatan, sarta jajaran Pangurus Ormas jeung OKP.

Kapala Bagian Administrasi Kesra Setda Kota Sukabumi, Dr. H. Dédé Nurdin, S.IP., M.Ag. ngajelaskeun, kagiatan Tarling Tim Safari Ramadhan Muspida Kota Sukabumi téh, dieusi acara Bubuka, Laporan Ketua DKM, Biantara Panjabat Wali Kota Sukabumi, Pamasrahan Bantuan Sarana Kaagamaan ka Masjid Besar Kacamatan jeung Masjid Jami Kalurahan, katut bantuan ka masjid anu digunakeun tempat Tarling Tim Safari Ramadhan jeung tanda mata, sarta ceramah jeung acara panutup.

Anapon maksud jeung tujuan dilaksanakeunnana Tarling Tim Safari Ramadhan ieu téh, diantarana pikeun ngali aspirasi warga masarakat Kota Sukabumi dina sagala widang, pikeun dijadikeun bahan kawijakan jeung program gawé Pamaréntah Kota Sukabumi, sarta pikeun ngaronjatkeun jeung mageuhan tali silaturahmi, antara Rombongan Tarling Tim Safari Ramadhan jeung warga masarakat, utamana dina usaha ngahontal Visi Pangwangunan Kota Sukabumi Taun 2005-2025, nya éta Ngawujudna Kota Sukabumi Sabagé Puseur Palayanan anu Hadé dina Widang Atikan, Kaséhatan jeung Padagangan di Jawa Barat, anu didadasaran ku Iman jeung Taqwa.