SAEUTIKNA AYA OPAT POTÉNSI KARAWANAN ANU KUDU DIANTISIPASI BABARENGAN KU SAKUMNA PIHAK

Reporter / Redaktur : ENDANG SUMARDI

Kapolri (Kapala Kapulisian Républik Indonésia), Jéndral Pulisi Drs. H. M. Tito Karnavian, M.A., Ph.D. nandeskeun, dina palaksanaan Oprasi Ketupat Lodaya Taun 2018, saeutikna aya opat poténsi karawanan anu kudu diantisipasi babarengan ku sakumna pihak. Kahiji stabilitas kasadiaan pangan, kadua masalah kalancaran kasalametan arus mudik jeung balik, katilu bencana alam jeung gangguan Kamtibmas (Kaamanan jeung Katartiban Masarakat), bégal hipnotis jeung imah kosong, sarta kaopat ancaman tindak pidana térorismeu.

Salajuna ditandeskeun, pikeun ngaantisipasi jeung ngungkulan éta poténsi karawan téh, Kapolri maréntahkeun ka sakumna rengrengan Polri, TNI jeung Pamaréntah Daérah sarta stake holder séjénna, sangkan gawé bareng ngaantisipasi éta karawanan. Maksud jeung tujuannana, supaya éta karawan téh teu ngajadi.

Ěta panandesan Kapolri téh, ditepikeun ku Panjabat Wali Kota Sukabumi, Drs. H. Dady Iskandar, M.M., dina Apél Gelar Pasukan Oprasi Ketupat Lodaya Taun 2018, anu dicalagarakeun ku Polres Sukabumi Kota, tanggal 6 Juni 2018, di Lapangan Merdéka Kota Sukabumi, dina raraga Pangamanan Idul Fitri Taun 1439 Hijriyah, anu dijadualkeun lumangsung salila 18 poé, cindekna ti tanggal 7 nepi ka tanggal 24 Juni 2018.

Sedengkeun pamilon éta Apél téh, ngawengku Sub Den Pom Sukabumi, Kodim 0607 Kota Sukabumi, Yonif 310 Kidang Kancana, Yon Arméd 13 Nanggala Kostrad, Setukpa Lemdiklat Polri Sukabumi, Polres Sukabumi Kota, Dines Pahubungan, Sat Pol PP. Kantor Kesbangpol, Pamadam Kabakaran, Dines Kaséhatan, OKP, ORARI, RAPI, Pramuka Saka Bhayangkara jeung PMI. Hadir dina kasempetan éta, Pingpinan katut Anggota DPRD Kota Sukabumi, Unsur FKPD (Forum Komunikasi Pingpinan Daérah) Kota Sukabumi, para Kapala SKPD (Satuan Kerja Parangkat Daérah) jeung Instansi Vértikal, sarta para tamu ondangan lianna.

Dina kasempetan éta, Panjabat Wali Kota Sukabumi sacara simbolis nyeumatkeun Pita Oprasi Ketupat Lodaya Taun 2018, ka pawakilan personil ti Sub Den Pom Sukabumi, Kodim 0607 Kota Sukabumi, Polres Sukabumi Kota, Sat Pol PP Kota Sukabumi, jeung Dines Pahubungan Kota Sukabumi. Disagigireun ti éta, Panjabat Wali Kota Sukabumi dibarengan ku Ketua DPRD Kota Sukabumi katut Unsur FKPD Kota Sukabumi, ngecék jeung mariksa kasiapan sakumna personil Oprasi Ketupat Lodaya Taun 2018.