PANJABAT WALI KOTA SUKABUMI MASRAHKEUN REMISI KA 226 WARGA BINAAN LAPAS KELAS 2 B NYOMPLONG KOTA SUKABUMI

Reporter / Redaktur : ENDANG SUMARDI

Panjabat Wali Kota Sukabumi, Drs. H. Dady Iskandar, M.M., sacara simbolis masrahkeun SK (Surat Kaputusan) Mentri Hukum jeung HAM (Hak Asasi Manusa) RI, Yasonna Hamonangan Laoly, S.H., M.Sc., Ph.D., Ngeunaan Remisi Husus Idul Fitri Taun 1439 Hijriyah, ka 226 Warga Binaan Lapas Kelas 2 B Nyomplong Kota Sukabumi, tina jumlah sagemblengna 457 Warga Binaan. Ěta SK téh dipasrahkeun di Lapas Kelas 2 B Nyomplong Kota Sukabumi, dina acara silaturahmi jeung pamasrahan remisi husus, cindekna satutas ngalaksanakeun Sholat Idul Fitri Taun 1439 Hijriyah, tanggal 1 Syawal 1439 Hijriyah atawa tanggal 15 Juni 2018.

Hadir dina kasempetan éta, Pingpinan katut Anggota DPRD Kota Sukabumi, Unsur FKPD (Forum Komunikasi Pingpinan Daérah) Kota Sukabumi, Panjabat Sekertaris Daérah Kota Sukabumi, para Asistén Daérah Setda Kota Sukabumi, Kapala Lapas Kelas 2 B Nyomplong Kota Sukabumi katut réngréngannana, para Kapala SKPD (Satuan Kerja Parangkat Daérah) jeung Instansi Vértikal nu aya kaitannana, Ketua TP PKK katut DWP (Dharma Wanita Pasatuan) Kota Sukabumi, sarta para tamu ondangan lianna.

Dina kasempetan éta, Panjabat Wali Kota Sukabumi ngaharepkeun, ku dipasrahkeunnana Remisi Husus Idul Fitri Taun 1439 Hijriyah ieu téh, bisa ngahudangkeun jeung ngaronjatkeun sumanget para Warga Binaan, hususna di Lapas Kelas 2 B Nyomplong Kota Sukabumi, pikeun salawasna usaha satékah polah ngaronjatkeun kasadaran, sikep jeung tingkah laku anu hadé, luyu jeung tungtunan katut ajaran agama sarta katangtuan aturan jeung undang-undang anu ditetepkeun dina kahirupan sapopoé. Salian ti éta ogé dijelaskeun, Pamasraheun Remisi Husus Idul Fitri Taun 1439 Hijriyah ieu téh, ngarupakeun sala sahiji wujud nyata pahatian jeung pangajén nagara ka para Warga Binaan, boh Nara Pidana boh Anak Pidana, anu sikep jeung tingkah lakuna hadé salila ngajalankeun pidanana.

Panjabat Wali Kota Sukabumi ngajelaskeun, pamasrahan remisi ieu téh ngarupakeun sala sahiji nimat jeung barokah anu kudu ditarima ku para Warga Binaan, hususna anu geus nyumponan pasaratan administratif jeung substantif anu geus ditetepkeun. Disagigireun ti éta, Panjabat Wali Kota Sukabumi ogé ngaharepkeun ka para Warga Binaan hususna di Lapas Kelas 2 B Nyomplong Kota Sukabumi, sangkan bisa sagancangna balik deui ka lingkungan masarakat jeung kulawargana masing-masing, dibarengan ku sikep jeung tingkah laku anu hadé, luyu jeung katangtuan aturan katut undang-undang anu ditetepkeun, sarta ajaran agama jeung norma di lingkungan masarakat masing-masing.

Leave a Reply