PANYALAGARAAN SHOLAT IDUL FITRI TINGKAT KOTA SUKABUMI TAUN 1439 HIJRIYAH LUMANGSUNG LANCAR

Reporter / Redaktur : ENDANG SUMARDI

Panyalagaraan Sholat Idul Fitri Tingkat Kota Sukabumi Taun 1439 Hijriyah anu dipuseurkeun di Lapangan Merdéka Kota Sukabumi tanggal 1 Syawal 1439 Hijriyah atawa tanggal 15 Juni 2018 lumangsung lancar, sarta aman, tartib jeung hidmat. Salian dilaksanakan di Tingkat Kota Sukabumi, Sholat Idul Fitri Taun 1439 Hijriyah ieu téh ogé dilaksanakan di Tingkat Kacamatan jeung Kalurahan sarta di Tingkat RW, anu dipuseurkeun di sajumlah lapangan jeung masjid jami.

Sedengkeun anu ngalaksanakeun Sholat Idul Fitri di Lapangan Merdéka Kota Sukabumi, diantarana Panjabat Wali Kota Sukabumi, Pingpinan katut Anggota DPRD Kota Sukabumi, Unsur FKPD (Forum Komunikasi Pingpinan Daérah) Kota Sukabumi, Panjabat Sekertaris Daérah Kota Sukabumi, para Asistén Daérah Setda Kota Sukabumi, para Kapala SKPD (Satuan Kerja Parangkat Daérah) jeung Instansi Vértikal, Jajaran Pangurus TP PKK katut DWP (Dharma Wanita Pasatuan) Kota Sukabumi, Jajaran Pangurus MUI (Majelis Ulama Indonésia) Kota Sukabumi, sarta para Alim Ulama, Inohong Masarakat, Wanoja, Pamuda jeung puluhan rébu umat Islam lianna.

Dina biantarana, Panjabat Wali Kota Sukabumi, Drs. H. Dady Iskandar, M.M. ngajelaskeun, sakumna kaom muslimin di sakuliah dunya, dina tanggal 1 Syawal 1439 Hijriyah ngareuah-reuah poé kaunggulan, satutas saméméhna ngalaksanakeun ibadah puasa salila sabulan campleng dina Bulan Suci Romadhon Taun 1439 Hijriyah, sabagé sala sahiji bukti nyata kataatan sakumna kaom muslimin ka Nu Maha Kawasa.

Tah ku sabab kitu, sakumna kaom muslimin di sakuliah dunya ngucapkeun takbir, tasbih, tahlil jeung tahmid dina poé kaunggulan, pikeun ngagungkeun asma Alloh, ku cara muji jeung rasa sukur kana sagala rupa rohmat jeung inayah, sarta nimat anu geus digolontorkeun ku Nu Maha Kawasa ka sakumna kaom muslimin, luyu jeung firman Alloh dina AL-Quran Surat AL-Baqoroh Ayat 185, anu hartina, jeung sakuduna anjeun ngagungkeun asma Alloh, kana sagala rupa pituduh-Na anu dibikeun ka anjeun, supaya anjeun ngucapkeun rasa sukur.

Salajuna dijelaskeun, kabagjaan jeung kanimatan anu dirasakeun ku sakumna kaom muslimin di sakuliah dunya, lantaran sakumna kaom muslimin geus ngajadikeun Bulan Suci Romadhon sabagé momentum pikeun meunang rohmat jeung maghfiroh ti Nu Maha Kawasa, sarta dijauhkan tina siksa seuneu naraka. Tah ku lantaran kitu, taya waktu anu kapiceun sarta beurang jeung peuting ngalaksanakeun rupa-rupa ibadah, boh ibadah mahdhoh atawa ibadah vértikal ka Alloh, boh ibadah ghoiru mahdhoh atawa ibadah horizontal ka papada jalma.

Panjabat Wali Kota Sukabumi ngaharepkeun, rupa-rupa ibadah anu dilaksanakeun salila Bulan Suci Romadhon Taun 1439 Hijriyah téh, jadi sala sahiji bukti nyata pangabdian anu ihlas ti sakumna kaom muslimin, sarta bisa ditarima ku Nu Maha Kawasa. Tah ku sabab kitu, taya basa jeung carita anu pang cocogna diucapkeun ku sakumna kaom muslimin di sakuliah dunya, salian ti Taqobbalallohu Minnaa Wa Minkum, Shiyaamanaa Wa Shiyaamakum, Minal Aidin Wal Faizin, Neda Dihampura Lahir jeung Batin.

Leave a Reply