KARUGIAN BENCANA DI KOTA SUKABUMI NGAHONTAL RP. 1.317.875.000,00

Reporter / Redaktur : ENDANG SUMARDI

Sakumaha anu diungkabkeun ku Kapala Séksi Panyegahan jeung Kasiapsiagaan BPBD (Badan Pananggulangan Bencana Daérah) Kota Sukabumi, Akhmad Zulkarnain, S.Ě., karugian bencana di Kota Sukabumi ti bulan Januari 2018 nepi ka bulan April 2018 ngahontal Rp. 1.317.875.000,00. Lian ti éta ogé diungkabkeun, jumlah karugian bencana salila 4 bulan téh, ampir ngahontal satengahna tina karugian bencana dina taun 2017 nu geus kaliwat, nya éta gedéna Rp. 2,7 miliar.

Anapon karugian pang gedéna bencana di Kota Sukabumi salila 4 bulan téh, nya éta anu diakibatkeun ku bencana angin topan jeung angin puting beliung, anu jumlahna ngahontal Rp. 544.375.000,00, disusul ku bencana urug ngahontal Rp. 290 juta, jeung bencana kahuruan ngahontal Rp. 272 juta. Sedengkeun bencana cuaca ékstrim ngahontal Rp. 165 juta, bencana lini ngahontal Rp. 36 juta, jeung bencana caah ngahontal Rp. 9,5 juta.

Salajuna karugian pang gedéna bencana di Kota Sukabumi dina taun 2017, nya éta anu diakibatkeun ku bencana urug ngahontal Rp. 1.057.800.000,00, disusul ku bencana kahuruan ngahontal Rp. 920.850.000,00, jeung bencana angin topan ngahontal Ro. 20 juta. Sedengkeun dampak karuksakan anu ditimbulkeun ku bencana di Kota Sukabumi, sumebar di 11 kalurahan. Nya éta Kalurahan Cikolé, Cisarua, Gunung Parang, Karangtengah, Karamat, Warudoyong, Tipar, Citamiang, Gedong Panjang, Nanggeléng jeung Kalurahan Cibeureum Hilir.

Saterusna diungkabkeun, tina 11 éta kalurahan téh, anu pang gedéna ngarandapan karugian nya éta Kalurahan Cikolé ngahontal Rp. 279.250.000,00, anu diakibatkeun ku 11 tangkal kai runtuh, sarta 5 imah, 1 masjid, 3 mobil, 1 sapédah motor jeung 1 gorobag ruksak. Leuwih jauh diungkabkeun, bencana di Kota Sukabumi anu pang réana nyababkeun karuksakan, nya éta bencana angin kenceng jeung angin beliung. Diantarana 42 imah, 1 masjid, 1 kios, 7 mobil, 5 sapédah motor, 6 baliho atawa réklameu jeung 3 gorobag ruksak, sarta 30 tangkal kai runtuh.

Kapala Séksi Panyegahan jeung Kasiapsiagaan BPBD Kota Sukabumi nandeskeun, Pamaréntah Kota Sukabumi ngaharepkeun, sangkan karugian materiil akibat bencana di Kota Sukabumi ka hareupna bisa diteken, ku cara ngaronjatkeun kasiapsiagaan dina nyangraheupan bencana. Tah ku lantaran kitu, BPBD Kota Sukabumi salawasna usaha satékah polah nyalagarakeun diseminasi PKDR (Panguatan Kasiapsiagaan Daérah Rawan) Bencana Hidrométéorologi, anu ngawengku 3 aspék, nya éta cuaca, iklim jeung parobahan iklim, sarta sosialisasi pangurangan risiko bahaya kahuruan jeung nu séjénna.

Leave a Reply