KPU KOTA SUKABUMI GEUS MUKA PANGDAPTARAN CALON ANGGOTA DPRD KOTA SUKABUMI TAUN 2019

Reporter / Redaktur : ENDANG SUMARDI

Sakumah anu ditandeskeun ku Komisionér Divisi Téhnis KPU (Komisi Pamilihan Umum) Kota Sukabumi, Agung Dugaswara, S.Sos., KPU Kota Sukabumi geus muka pangdaptaran Caleg (Calon Legislatif) atawa Calon Anggota DPRD Kota Sukabumi Taun 2019, cindekna ti tanggal 4 nepi ka tanggal 17 Juli 2018. Salian ti éta, KPU Kota Sukabumi ogé keur ngalaksanakeun sosialisasi ka Parpol (Partéy Politik) jeung warga masarakat Kota Sukabumi anu baris maju jadi Bakal Caleg. Lantaran satiap warga masarakat anu rék maju sabagé Caleg, kudu dirékoméndasikeun jeung meunang panyaluyuan sarta kudu diajukeun ku Pingpinan Parpolna anu sah, luyu jeung tingkatannana.

Saterusna ditandeskeun, sanggeus prosés pangdaptaran Caleg réngsé, KPU Kota Sukabumi rék ngalaksanakeun vérfikasi administrasi, diteruskeun kana mangsa ngalengkepan kakurangan pasaratan jeung panetepan DCS (Daptar Calon Saheulaanan). Disagigireun ti éta, satiap Parpol anu rék ngadaptarkeun Bakal Calegna, kudu merhatikeun Bakal Caleg Wanoja di satiap Dapil (Daérah Pamilihan)-nana. Sabab dumasar kana katangtuan, Bakal Caleg Wanoja téh pang saeutikna kudu ngahontal 30 peresén di satiap tingkatan Dapil.

Anapon pasaratan séjénna anu kudu dilengkepan ku satiap Caleg Taun 2019 téh, nya éta kudu masrahkeun LHKPN (Laporan Harta Kakayaan Panyalagara Nagara), luyu jeung Rancangan Undang-Undang KPU Taun 2018 Pasal 8 jeung 9, ngeunaan Panyalonan Pamilon Pamilu (Pamilihan Umum) Anggota DPR RI, DPRD Propinsi sarta DPRD Kabupatén jeung Kota. Salajuna ditandeskeun, pikeun ngarojong kalancaran para Caleg dina nyieun LHPKN, KPU RI geus ngalaksanakeun koordinasi jeung KPK (Komisi Pangbarantasan Koropsi) RI, hususna nu aya kaitannana jeung pamariksaan LHKPN pikeun para Caleg.

Nyigeung ngeunaan Calon Wali Kota katut Wakil Wali Kota Sukabumi anu teu kapilih dina Pilkada (Pamilihan Kapala Daérah) Kota Sukabumi Taun 2018 sarta hayang nyalonkeun jadi Anggota DPRD Kota Sukabumi, DPRD Propinsi Jawa Barat jeung DPR RI Taun 2019, nurutkeun Komisionér Divisi Téhnis KPU Kota Sukabumi, dumasar kana aturan dihégaékeun. Disagédéngeun ti éta ogé dijelaskeun, pikeun ngarojong kalancaran prosés pangdaptaran Caleg Taun 2019, KPU Kota Sukabumi arék salawasna usaha satékah polah méré palayanan jeung narima pangdaptaran ka satiap Parpol jeung warga masarakat Kota Sukabumi, ka asup ka Calon Wali Kota katut Wakil Wali Kota Sukabumi anu teu kapilih dina Pilkada Kota Sukabumi Taun 2018 anu hayang maju jadi Bakal Caleg Taun 2019.

Leave a Reply