PAMARÉNTAH KOTA SUKABUMI BARIS NERAPKEUN PROGRAM É-KINERJA KACAMATAN JEUNG KALURAHAN

Reporter / Redaktur : ENDANG SUMARDI

Pamaréntah Kota Sukabumi ngaliwatan Bagian Tapem (Tata Pemerintahan) Setda Kota Sukabumi, baris nerapkeun program é-Kinerja Kacamatan jeung Kalurahan. Maksud jeung tujuannana, nurutkeun Kapala Bagian Tapem Setda Kota Sukabumi, Punjul Saépul Hayat, S.STP., M.Si., dibarengan ku Kapala Sub Bagian Bina Parangkat Kacamatan jeung Kalurahan Bagian Tapem Setda Kota Sukabumi, Nia Vaulina, S.H., nya éta pikeun ngajén kakurangan jeung kaunggulan kinerja satiap kacamatan jeung kalurahan di Kota Sukabumi.

Salian ti éta, é-Kinerja éta téh ngarupakan wahana kontroling jeung pametaan panyaluran anggaran, supaya tepat sasaran. Tah ku ayana éta hal téh, Pamaréntah Kota Sukabumi bisa nempo jeung metakeun poténsi wewengkon kinerja palayanan ka masarakat, sarta bisa apal kana rupa-rupa hal anu dibutuhkeun ku satiap kacamatan jeung kalurahan sa Kota Sukabumi.

Anapon usaha pikeun ngarojong kalancaran dina ngalaksanakeun jeung nerapkeun éta program téh, dina bulan Juni 2018 anu geus kaliwat, aplikasina geus diuji coba di 3 kacamatan jeung 7 kalurahan sa Kota Sukabumi, nya éta di Kacamatan Baros, Kacamatan Citamiang, jeung Kacamatan Lembursitu. Sedengkeun éta program téh, nurutkeun rarancang baris dilaksanakeun dina taun 2019 nu bakal datang, sarta baris diterapkeun di sakumna kacamatan jeung kalurahan sa Kota Sukabumi.

Disagigireun ti éta, ogé keur dijieun Rancangan Perwal (Peraturan Wali Kota) Sukabumi, pikeun nguatan palaksanaan éta program. Saterusna diharepkeun, Wali Kota Sukabumi anyar hasil Pilkada (Pamilihan Kapala Daérah) Kota Sukabumi Taun 2018, bisa nerbitkeun jeung nerapkeun éta Perwal, sangkan dina mangsa éta program diwanohkeun téh geus aya Perwalna.

Lian ti éta ogé dijelaskeun, dina nerapkeun éta aplikasi téh, didasarkeun kana 3 paraturan, nya éta Permendagri (Peraturan Mentri Dalem Negri) RI Nomer 81 Taun 2015 Ngeunaan Ěvaluasi Kamekaran Désa jeung Kalurahan, PermenPAN-RB (Peratuan Mentri Pandayagunaan Aparatur Nagara jeung Réformasi Birokrasi) RI Nomer 17 Taun 2017 Ngeunaan Padoman Pangajénan Kinerja Unit Panyalagara Palayanan Publik, jeung Pergub (Peraturan Gubernur) Jawa Barat Nomer 24 Taun 2018 Ngeunaan Daptar Noménklatur Jabatan Palaksana PNS (Pagawé Negri Sipil) dina Parangkat Daérah Propinsi Jawa Barat. Salajuna dijelaskeun, dina éta Paraturan téh kaunggel rupa-rupa hal, pikeun ngukur kinerja kacamatan jeung kalurahan.

Leave a Reply