SALILA 4 POÉ PANJABAT WALI KOTA SUKABUMI JADI PAMILON RAKERNAS KA 13 APEKSI TAUN 2018

Reporter / Redaktur : ENDANG SUMARDI

Salila 4 poé, cindekna ti tanggal 24 nepi ka tanggal 27 Juli 2018 nu geus klaliwat, Panjabat Wali Kota Sukabumi, Drs. H. Dady Iskandar, M.M., dibarengan ku Asistén Pamaréntahan Setda Kota Sukabumi, Drs. H. Andri Setiawan, M.M., katut para Kapala OPD (Organisasi Parangkat Daérah) nu aya kaitannana, jadi pamilon Rakernas (Rapat Kerja Nasional) Ka 13 Apeksi (Asosiasi Pemerintah Kota Seluruh Indonésia) Taun 2018.

Kagiatan éta téh dibuka sacara resmi ku Dirjén Otda (Diréktur Jéndral Otonomi Daérah) Kemendagri (Kementrian Dalem Negri) RI sakaligus sabagé Panjabat Gubernur Sulawesi Selatan, Dr. Soni Sumarsono, M.DM., ngawakilan Mendagri (Mentri Dalem Negri) RI, Tjahjo Kumolo, S.H., anu ditandaan ku Nakol Goong, cindekna tanggal 25 Juli 2018, di Kayan Multifunction Hall Hotél Tarakan Plaza, Jalan Yos Sudarso Kota Tarakan Propinsi Kalimantan Utara.

Dirjén Otda Kemendagri RI, dina biantarana ngajelaskeun pentingna gawé bareng daérah, pikeun ngaronjatkeun jeung ngahangkeutkeun paékonomian jeung pangwangunan, anu muarana pikeun ngasajahtrakeun masarakat. Ěta hal téh ngarupakan cara pamaréntah daérah, pikeun ngaronjatkeun kasajahtraan masarakat ngaliwatan pangwangunan anu leuwih sarua jeung adil. Salajuna dijelaskeun, éta hal téh diatur dina Undang-Undang Nomer 23 Taun 2014 ngeunaan Pamaréntahan Daérah, ti mimiti Pasal 363 nepi ka Pasal 369. Dina éta papagon téh sacara tegas jeung jelas ngatur ngeunaan gawé bareng daérah. Ngan éta gawé bareng téh kudu didasarkeun kana panimbangan anu épisién jeung épéktip, hususna nu aya kaitannana jeung palayanan publik, sarta kudu silih nguntungkeun.

Anapon subjék gawé bareng daérah téh ngawengku gubernur, bupati jeung wali kota. Sedengkeun objék gawé barengna, nya éta urusan pamaréntahan anu jadi kawenangan daérah, pikeun ngawujudkeun kasajahtraan masarakat, pangwangunan daérah jeung ngahangkeutkeun kacumponannana palayanan publik. Saterusna bentuk gawé barengna kacida réa pisan jenisna. Diantarana gawé bareng daérah jeung daérah séjén, gawé bareng daérah jeung pihak katilu atawa swasta, sarta gawé bareng daérah jeung lembaga atawa pamaréntah daérah di luar negri, luyu jeung kataangtuan undang-undang anu ditetepkeun.

Kitu deui ngeunaan modélna, gawé bareng daérah téh kawilang réa kategorina, diantarana gawé bareng wajib jeung gawé bareng sukaréla. Anapon gawé bareng wajib ngarupakeun gawé bareng jeung sasama daérah anu pang deukeutna, dina panyalagaraan urusan pamaréntahan, saperti pikeun pangwangunan infrastruktur. Sedengkeun gawé bareng sukaréla, ngarupakeun gawé bareng anu dilaksanakeun ku daérah, boh jeung daérah anu pang deukeutna boh jeung daerah anu jauh, dina panyalagaraan urusan pamaréntahan anu jadi kawenangan daérah, nya éta leuwih éféktip jeung épisién saupama dilaksanakeun gawé bareng. Sabagé sala sahiji contona, nya éta gawé bareng antara Pamaréntah Kota Surakarta jeung Pamaréntah Kota Yogyakarta, Surabaya jeung Makasar dina widang Pariwisata jeung Informasi Téknologi.

Leave a Reply