PANJABAT WALI KOTA SUKABUMI JADI PAMILON RAKORNAS KA 9 TPID TAUN 2018

Reporter / Redaktur : ENDANG SUMARDI

Panjabat Wali Kota Sukabumi, Drs. H. Dady Iskandar, M.M., jadi pamilon Rakornas (Rapat Koordinasi Nasional) Ka 9 TPID (Tim Pangadalian Inflasi Daérah) Taun 2018, anu dilaksanakeun ku Bank Indonésia, cindekna tanggal 26 Juli 2018, di Hotél Grand Sahid Jaya Jakarta. Ěta kagiatan anu ngangkat téma Ngahangkeutkeun Pangwangunan Infrastruktur pikeun Ngawujudkeun Stabilitas Harga jeung Tumuwuhna Ěkonomi anu Inklusif sarta Ngabogaan Ajén anu Hadé téh, dibuka sacara resmi ku Persidén RI, Ir. H. Joko Widodo, anu ditangaraan ku Nakol Goong.

Hadir dina kasempetan éta, Mentri Koordinator Widang Paékonomian, Darmin Nasution, Mentri Koordinator Widang Kamaritiman, Luhut Binsar Pandjaitan, Mentri Dalem Negri, Tjahjo Kumolo, S.H., Mentri Pahubungan, Budi Karya Sumadi, Wakil Mentri ĚSDM (Ěnergi jeung Sumber Daya Mineral), Archandra Tahar, Gubernur Bank Indonésia, Pérry Warjiyo, Ketua Déwan Komisionér Otoritas Jasa Kauangan, Winboh Santoso, jeung para tamu ondangan lianna.

Dina biantarana, Persidén RI, Ir. H. Joko Widodo, ngahaturkeun nuhun ka sakumna Kapala Daérah anu hadir jeung milu Rakornas Ka 9 TPID Taun 2018 ieu. Sabab dina sajero 3 taun ieu, inflasi di Indonésia kawilang handap, nya éta di handap 4 peresén. Ěta hal téh teu leupas tina kinerja sakumna pihak, ka asup Kapala Daérah. Tah ku sabab kitu, rupa-rupa usaha pangadalian inflasi téh kudu terus dilaksanakeun, hususna koordinasi antara pamaréntah puseur jeung pamaréntah daérah, sarta kudu salawasna dironjatkeun. Salian ti ka Kapala Daérah, Persidén RI ogé ngahaturkeun nuhun ka TPIP (Tim Pangadalian Inflasi Puseur) jeung TPID. Salajuna dijelaskeun, koordinasi antara Pamaréntah Puseur jeung Pamaréntah Daérah geus lumangsung hadé jeung beuki hadé, sarta geus aya Satgas (Satuan Patugas) Pangan ti mimiti puseur nepi ka daérah.

Sedengkeun Gubernur Bank Indonésia, Pérry Warjiyo, dina laporannana ngajelaskeun, rupa-rupa hasil penting pangadalian inflasi, ngarupakeun buah tina koordinasi kawijakan anu beuki kuat antara Pamaréntah Puseur jeung Pamaréntah Daérah katut Bank Indonésia, dina ngajaga stabilitas makro-ékonomi. Tah ku ayana éta hal téh, Gubernur Bank Indonésia kacida ngajénna kana pangrojong Pamaréntah Puseur jeung Pamaréntah Daérah, ngaliwatan rupa-rupa program inovatif anu geus dilaksanakeun ku TPIP jeung TPID, anu pamustungannana nepi ka patengahan taun 2018, inflasi bisa dikadalikeun. Malah réalisasi inflasi dina pariodeu Idul Fitri taun 2018 leuwih handap saupama dibandingkeun jeung 3 taun ka tukang, nya éta ti taun 2015 nepi ka taun 2017. Ěta hal téh kacida pentingna, nya éta pikeun nangtukeun inflasi dina ahir taun 2018 jeung taun-taun saterusna.

Leave a Reply