PANJABAT WALI KOTA SUKABUMI JADI PAMILON RAKOR USAHA NGUNGKULAN RUNTAH PADET KAASUP RUNTAH PALASTIK

Reporter / Redaktur : ENDANG SUMARDI

Panjabat Wali Kota Sukabumi, Drs. H. Dady Iskandar, M.M., dibarengan ku Kapala DLH (Dines Lingkungan Hirup) Kota Sukabumi, Drs. Adil Budiman, M.Si., jadi pamilon Rakor (Rapat Koordinasi) Usaha Ngungkulan Runtah Padet kaasup Runtah Palastik di Kawasan Régional, Pakotaan jeung Déstinasi Pariwisata. Ěta Rakor téh dibuka sacara resmi ku Mentri Kordinator Widang Kamaritiman, Luhut Binsar Pandjaitan, cindekna tanggal 7 Agustus 2018, di Hotél Borobudur Jakarta.

Dina biantarana, Mentri Kordinator Widang Kamaritiman meredih ka sakumna Kapala Darah, sangkan daria jeung usaha satékah polah ngungkulan masalah runtah di wewengkonna masing-masing sacara hadé. Sabab ku ngungkulan runtah sacara hadé téh, ngarupakeun sala sahiji warisan positip, anu bisa ditinggalkeun dina mangsa mungkas jabatan salaku Kapala Daérah.  Tah ku hal éta téh, éta Kapala Daérah téh baris mibanda légacy atawa ajén utama kapamingpinan anu hadé. Salian ti éta, Mentri Kordinator Widang Kamaritiman ogé meredih ka sakumna Pamaréntah Daérah, sangkan diajar tina kapunjulan daérah séjén dina ngungkulan runtah, supaya dina usaha ngungkualan runtah ieu téh bisa dijadikeun gerakan nasional.

Sedengkeun Panjabat Wali Kota Sukabumi, Drs. H. Dady Iskandar, M.M. nandeskeun, ASN (Aparatur Sipil Nagara) bisa jadi tuladan atawa conto anu hadé dina ngungkulan jeung ngurangan réana runtah, ti mimiti tempat padumukan jeung kantor tempat digawé. Sabab usaha dina ngungulan runtah ieu téh, pamaréntah moal bisa digawé sorangan tanpa ayana pangrojong jeung kasadaran ti sakumna warga masarakat ka asup ti ASN. Tah ku sabab kitu, Panjabat Wali Kota Sukabumi cumeluk sakaligus meredih ka sakumna lapisan warga masarakat kaasup ASN di Kota Sukabumi, sangkan babarengan usaha satékah polah ngungkulan masalah runtah hususna di Kota Sukabumi, supaya Kota Sukabumi salawasna jadi kota anu bersih jeung séhat.

Salajuna Kapala DLH Kota Sukabumi, Drs. Adil Budiman, M.Si. ngajelaskeun, pihakna keur nyusun Jakstrada (Kawijakan Strategi Daérah) dina ngungkulan runtah di Kota Sukabumi. Disagigireun ti éta, Kapala DLH Kota Sukabumi ngaharepkeun, dina ngungkulan jeung ngurangan réana runtah di Kota Sukabumi aya peran jeung ilu biung warga masarakat, ngaliwatan pangalolaan runtah ti hulu atawa rumah tangga, ku cara milih runtah organik jeung anorganik. Sabab runtah organik bisa dijadikeun kompos ngaliwatan prosés lombang biopori, jeung runtah anorganik bisa dimangpaatkeun ngaliwatan program 3-R, anu pamustungannana bisa nagabogaan ajén ékonomi. Saterusna dijelaskeun, pihakna arék nyusun aturan ngeunaan usaha ngurangan pamakéan kantong palastik anu digunakeun ku ritél, kaasup dina panyadiaan hidangan rapat di satiap SKPD (Satuan Kerja Parangkat Daérah) sarta instansi jeung pausahaan di Kota Sukabumi, anu bersih tina bungkus palastik.

Leave a Reply