CINDEKNA 73 TAHUN ANU GEUS KALIWAT BANGSA URANG GEUS NGAMROKLAMASIKEUN KAMERDÉKAAN NAGARA INDONÉSIA

Reporter :  ARIF HIDAYAT

Redaktur : ENDANG SUMARDI

Panjabat Wali Kota Sukabumi, Drs. H. Dady Iskandar, M.M. nandeskeun, cindekna 73 tahun anu geus kaliwat, bangsa urang anu diwakilan ku Bung Karno katut Bung Hatta geus ngamroklamasikeun kamerdékaan nagara Indonésia ka sakuliah dunya. Ahirna cita-cita anu geus lila ditungguan ku bangsa urang téh jadi kanyataan. Para pahlawan urang geus lila ngorbankeun jiwa, raga jeung harta, pikeun ngusir penjajah anu terus-terusan nguras jeung nyangsarakeun nagara urang. Ěta panandesan Panjabat Wali Kota Sukabumi téh, ditepikeun dina Upacara Pangibaran Duplikat Bandéra Pusaka Mérah Putih dina raraga Milang Kala Ka 73 Kamerdékaan RI Taun 2018 Tingkat Kota Sukabumi, 17 Agustus 2018, di Lapangan Merdéka Kota Sukabumi.

Salajuna ditandeskeun, ayeuna urang geus hirup dina jaman merdéka, tapi lain hartina pajoangan urang geus réngsé, sabab tanggung jawab anu gedé anu dibikeun ku para pahlawan katut pajoang ka urang téh, nya éta ku cara ngeusian kamerdékaan ngaliwatan gawé anu rancagé jeung méré kontribusi anu hadé  pikeun kamajuan nagara jeung bangsa Indonésia. Tah ku lantaran kitu, urang kudu ngeusian kamerdékaan téh ku rupa-rupa hal nu aya mangpaatna pikeun ngawangun bangsa jeung nagara urang, ulah méakeun énergi jeung rupa-rupa hal nu taya gunana jeung ngarugikeun urang.

Lian ti éta ogé ditandeskeun, panumpesan koropsi, bahaya narkoba, panguatan daya saing jeung karuksakan lingkungan hirup, ngarupakeun tangtangan jeung ulah nepi ka ngurangan kana sumanget urang. Tapi kudu salawasna ngarasa yakin, sabab ku rido Nu Maha Kawasa jeung salila urang ngahiji sabagé sasama anak bangsa sarta ngabogaan sikep anu daria pikeun digawé anu rancagé jeung amanah mah, urang pasti bisa ngungkulannana sacara hadé.

Hadir dina kasempetan éta, Pingpinan katut Anggota DPRD Kota Sukabumi, Kapala Setukpa Lemdiklat Polri Sukabumi, unsur FKPD (Forum Koordinasi Pingpinan Daérah) Kota Sukabumi, Komandan Sub Denpom Sukabumi, Komandan Yonif 310 Kidang Kancana, Komandan Yon Armed 13 Nanggala Kostrad, Panjabat Sekertaris Daérah Kota Sukabumi, Ketua TP PKK Kota Sukabumi, Ketua DWP (Dharma Wanita Pasatuan) Kota Sukabumi, para Asistén Daérah Setda Kota Sukabumi, para Kapala OPD (Organisasi Parangkat Daérah) jeung Instansi Vértikal, para mantén Wali Kota katut Wakil Wali Kota Sukabumi, para Sesepuh, Alim Ulama, Inohong Masarakat, Kaom Cerdik Cendikia, para Perintis jeung Pajoang Kemerdékaan, Warakawuri, Wirawati Catur Panca, Purnawirawan, PWRI, Organisasi Kajoangan, Kamasarakatan, Pemuda jeung Wanoja, sarta para tamu ondangan liana.

Leave a Reply