KACAMATAN BAROS JADI DUTA KOTA SUKABUMI DINA PANGAJÉNAN SINERGITAS KINERJA KACAMATAN

Reporter :  ARIF HIDAYAT

Redaktur : ENDANG SUMARDI

Kacamatan Baros jadi duta Kota Sukabumi, dina Pangajénan Sinergitas Kinerja Kacamatan Tingkat Propinsi Jawa Barat Taun 2018. Lantaran éta kacamatan téh hasil nyangking gelar juara kahiji Sinergitas Kacamatan Tingkat Kota Sukabumi Taun 2018, sakaligus sabagé wujud pangajénan Wali Kota Sukabumi kana komitmen jeung kinerja sarta inovasi Camat Baros katut réngréngannana, dina méré palayanan anu hadé ka warga masarakat. Salian ti éta, ogé poténsi nu aya di Kacamtan Baros téh kacida luar biasana, anu pamustungannana éta kacamatan téh mampuh jadi Kacamatan Budaya jeung ngabogaan produk ungulan hasil tatanén Buah Naga katut hasil olahannana di Kota Sukabumi.

Anapon pangajénannana geus dilaksanakeun, cindekna dina tanggal 10 Agustus 2018, sarta kadatangan Tim Pangajénna dibagéakeun jeung ditarima sacara resmi ku Panjabat Wali Kota Sukabumi, Drs. H. Dady Iskandar, M.M., di Rohangan Pasamoan Kantor Kacamatan Baros. Hadir dina kasempetan éta, Unsur FKPD (Forum Komunikasi Pingpinan Daérah) Kota Sukabumi, para Kapala OPD (Organisasi Parangkat Daérah) jeung instansi vértikal, para Camat jeung Lurah sa Kota Sukabumi, Ketua TP PKK, Ketua LPM (Lembaga Pangbardayaan Masarakat), para Ketua RW jeung RT, Alim Ulama, Inohong Masarakat, Pamuda jeung Wanoja, katut para tamu ondangan lianna.

Panjabat Wali Kota Sukabumi, Drs. H. Dady Iskandar, M.M., dina biantarana nandeskeun, ti mimiti taun 2016 Kota Sukabumi dijadikeun Rolé Modél atawa Pacontohan Palayanan Publik diantara 56 Kabupatén jeung Kota sa Indonésia, anu geus diévaluasi ku KemenPAN-RB (Kamentrian Pandayagunaan Aparatur Nagara jeung Réformasi Birokrasi), husuna dina Palayanan Publik di DPMPTSP (Dines Pananeman Modal jeung Palayanan Terpadu Satu Pintu) Kota Sukabumi, Disdukcapil (Dines Kapadumukan jeung Panyatetan Sipil) Kota Sukabumi, sarta RSUD (Rumah Sakit Umum Daérah) R. Syamsudin, S.H. Kota Sukabumi. Tah ku sabab kitu, usaha dina ngoméan palayanan publik téh terus-terusan dilaksanakeun jeung jadi andelan utama Pamaréntah Kota Sukabumi.

Sedengkeun maksud jeung tujuan dilaksanakeunnana ieu pangajénan téh, diantarana pikeun ngukur jeung ngaévaluasi kinerja parangkat kacamatan, dina panyalagaraan pamaréntahan, pangwangunan jeung kamasarakatan. Disagigireun ti éta, ogé pikeun ngajén kondisi émpirik palaksanaan urusan pamaréntahan di kacamatan, sarta pikeun ngukur tingkat kahontalna gawé dina panyalaggaraan pamaréntahan di kacamatan.

Salajuna pikeun ngadorong sakaligus ngaronjatkeun koordinasi jeung kapaduan kinerja diantara panyalagara pamaréntahan di wewengkon kacamatan, pikeun ngahangkeutkeun pangwangunan, ngamekarkeun pangwangunan, monivasi jeung inovasi, sarta kréatifitas dna ngahangkeutkeun panyalagaraan program pangwangunan, hususna nu aya kaitannana jeung paningkatan palayanan publik katut kasajahtraan masarakat. Lian ti éta ogé pikeun ngaronjatkeun kapasitas aparatur kacamatan, hususna dina panyalagaraan palayanan dasar jeung pangbardayaan poténsi paékonomian masarakat di wilayah.

Leave a Reply