JUMLAH HÉWAN QURBAN ANU DIPEUNCIT DI BURUAN MASJID AGUNG KOTA SUKABUMI NGAHONTAL 26 HÉWAN QURBAN

Reporter / Redaktur : ENDANG SUMARDI

Jumlah Héwan Qurban anu dipeuncit di Buruan Graha Qolbun Salim Masjid Agung Kota Sukabumi dina poéan Idul Adha Taun 1439 Hijriyah ngahontal 26 Héwan Qurban, nya éta 17 Sapi jeung 9 Domba. Ngan saméméh dilaksanakeun meuncit éta Héwan Qurban téh, leuwih ti heula dipasrahkeun Héwan Qurban sacara simbolis, nya éta ti Panjabat Wali Kota Sukabumi, Drs. H. Dady Iskandar, M.M., ka Panata Calaqara Qurban Tingkat Kota Sukabumi Taun 1439 Hijriyah, H. Dédén Soléhudin, S.Ag., M.M.

Dina biantarana, Panjabat Wali Kota Sukabumi nandeskeun, jumlah umat Islam di Kota Sukabumi anu Meuncit Héwan Qurban dina saban Idul Adha salawasna ngaronjat. Hal éta téh nangarakeun, yén kaimanan jeung kataqwaan sarta kasadaran jeung kapadulian sosial umat Islam di Kota Sukabumi ka warga masarakat anu kurang jeung anu teu mampuh, hususna anu ngabutuhkeun Daging Héwan Qurban, dina satiap taunna salawasna ngaronjat.

Tah ku ayana éta hal téh, Panjabat Wali Kota Sukabumi kalayan asmana pribadi katut Pamaréntah Kota Sukabumi, ngahaturkeun nuhun ka sakumna umat Islam di Kota Sukabumi anu Meuncit Héwan Qurban dina saban Idul Adha sakaligus ngaharepkeun, sangkan kaimanan jeung kataqwaan sarta kasadaran jeung kapadulian sosial umat Islam di Kota Sukabumi ka warga masarakat anu kurang jeung anu teu mampuh téh, salawasna dironjatkeun jeung dimekarkeun dina rupa-rupa widang, pikeun ngawujudkeun warga masarakat jeung Pamaréntah Kota Sukabumi anu Rahmatan Lil Alamin.

Sedengkeun Panata Calaqara Qurban Tingkat Kota Sukabumi Taun 1439 Hijriyah, H. Dédén Soléhudin, S.Ag., M.M. ngajelaskeun, Héwan Qurban anu dipeuncit di Buruan Graha Qolbun Salim Masjid Agung Kota Sukabumi téh, nya éta ti Pamaréntah Kota Sukabumi, Panjabat Wali Kota Sukabumi, Ketua DPRD Kota Sukabumi, katut Panjabat Sekertaris Daérah Kota Sukabumi.

Salajuna ti Dines Kaséhatan Kota Sukabumi, BPR (Bank Pangkiriditan Rahayat) Pasar Kota Sukabumi, RSUD (Rumah Sakit Umum Daérah) R. Syamsudin, S.H. Kota Sukabumi, PDAM TBW (Pausahaan Daérah Air Minum Tirta Bumi Wibawa) Kota Sukabumi, Télkomsel, Toserba Selamat, Gabungan Pangurus Masjid Agung Kota Sukabumi, Gabungan OPD (Organisasi Parangkat Daérah) jeung SKPD (Satuan Kerja Parangkat Daérah), Bagian Kesra Setda Kota Sukabumi, Kantor Kemenag (Kementrian Agama) Kota Sukabumi, Bank Jabar Banten Cabang Kota Sukabumi, Bank BRI Cabang Sukabumi, jeung Bank Sinar Mas. Saterusna ti pasaurangan pajabat jeung warga masarakat, nya éta ti H. Andri Setiawan Hamami, S.H., dr. Hj. Ritanénny Ědlien Silyéna Mirah, M.P., Dian Sucianti, S.Ě., Drs. H. Ipin Syaripin, drh. H. Suranto Sumowiryo, dr. H. Ridwan, jeung Usép Karmana.

Anapon sasaran panarima éta Daging Héwan Qurban téh, nya éta para mudhohi, warga masarakat di sabudeureun Masjid Agung Kota Sukabumi, Lembaga, Organisasi, Majelis Talim, Panti Asuhan jeung Kaom Dhuafa. Sedengkeun téma anu diangkat dina panyalagaraan Meuncit Héwan Qurban dina Idul Adha Taun 1439 Hijriyah téh, nya éta Ku Sumanget Ngalaksanakeun Qurban Urang Tingkatkeun Kapadulian Sosial Dina Ngawujudkeun Kajamaahan Ummat.

Leave a Reply