ĚHA JULAÉHA KADER PANGGERAK TAAT PAJEG PANG HADÉNA TAUN 2018

Reporter / Redaktur : ENDANG SUMARDI

Sala saurang warga masarakat RT 04 RW 04 Kalurahan Dayeuhluhur, Kacamatan Warudoyong, Kota Sukabumi, Ěha Julaéha, utusan Puseur Pangalolaan Pandapatan Daérah Wilayah Kota Sukabumi, hasil meunang layang pangajén sabagé Kader Panggerak Taat Pajeg Pang Hadéna Inténsifikasi Pamulutan Pajeg Kandaraan Propinsi Jawa Barat Taun 2018. Ěta layang pangajén téh dipasrahkeun langsung ku Panjabat Gubernur Jawa Barat, Komisaris Jéndral Mochamad Iriawan, dina Apél Pangéling-ngéling Poé Jadi Ka 73 Propinsi Jawa Barat, cindekna tanggal 19 Agustus 2018, di Lapangan Gasibu Bandung. Hadir dina kasempetan éta, unsur FKPD (Forum Komunikasi Pingpinan Daérah) Propinsi Jawa Barat, Sekertaris Daérah Propinsi Jawa Barat, para Kapala OPD (Organisasi Parangkat Daérah) di lingkungan Pamaréntah Propinsi Jawa Barat, para Bupati katut Wali Kota sa Jawa Barat, sarta para tamu ondangan lianna.

Panjabat Gubernur Jawa Barat, Komisaris Jéndral Mochamad Iriawan, dina biantarana ngahaturkeun nuhun ka sakumna réngréngan pamaréntahan jeung warga masarakat Propinsi Jawa Barat, anu geus gawé sabilulungan ngawangun jeung ngamajukeun sakaligus ngawujudkeun cita-cita pamaréntah jeung warga masarakat Jawa Barat, jadi propinsi anu sajahtra jeung pang hareupna di Indonésia. Salajuna diungkabkeun, ti mangsa kamerdékaan nepi ka danget ieu, kontribusi Jawa Barat ka Indonésia kacida strategis. Lain lantaran Jawa Barat sabagé sala sahiji ti dalapan propinsi munggaran di Indonésia anu dibentuk dua poé satutas Proklamasi Kamerdékaan, tapi Jawa Barat téh ngarupakeun propinsi pang hareupna dina ngawangun kamajuan jeung inovasi.

Tah ku ayana éta hal téh, teu héran saupama Propinsi Jawa Barat anu jumlah padumukna pang réana di Indonésia, nya éta ampir ngahontal 48 juta jiwa téh, jadi langganan nyangking rupa-rupa prestasi nasional jeung internasional. Panjabat Gubernur Jawa Barat ngajelaskeun, Pangéling-ngéling Poé Jadi Ka 73 Propinsi Jawa Barat ieu téh, dilaksanakeun dina kaayaan anu nyugemakeun, nya éta satutas ngaliwatan mangsa tahapan Pilkada (Pamilihan Kapala Daérah) Bareng Taun 2018, anu lumangsung aman, lancar, tartib jeung démokratis.

Sedengkeun Panjabat Wali Kota Sukabumi, Drs. H. Dady Iskandar, M.M., nandeskeun kacida luar biasa sakaligus ngahaturkeun nuhun ka sala saurang warga masarakat RT 04 RW 04 Kalurahan Dayeuhluhur, Kacamatan Warudoyong, Kota Sukabumi, Ěha Julaéha, sabagé Kader Panggerak Taat Pajeg Pang Hadéna Inténsifikasi Pamulutan Pajeg Kandaraan Propinsi Jawa Barat Taun 2018. Saterusna ditandeskeun, ku gawé anu rancagé, kagigihan, kauletan jeung sumangat anu luhur sabagé Kader Panggerak Taat Pajeg, meunang pangajén ti Gubernur Jawa Barat, sakaligus ngabogaan hak meunang hiji kandaraan.

Leave a Reply