DINES PAHUBUNGAN KOTA SUKABUMI NYALAGARAKEUN DEUI OPEN TOURNAMÉNT BOLA VOLI TAUN 2018

Reporter / Redaktur : ENDANG SUMARDI

Dines Pahubungan Kota Sukabumi, nyalagarakeun deui Open Tournamént Bola Voli Taun 2018 pikeun katilu kalian, marebutkeun Piala Wali Kota Sukabumi jeung uang pembinaan anu gedéna 40 juta rupia, dina raraga ngareuah-reuah jeung ngagubyarkeun pangéling-ngéling Poé Pahubungan Nasional Taun 2018 Tingkat Kota Sukabumi, anu titi mangsana tanggal 17 Séptémber 2018. Ěta Open Tournamént Bola Voli anu diiluan ku 29 tim putra jeung 14 tim putri sa Jawa Barat jeung Banten téh, dijadwalkeun lumangsung salila 22 poé, nya éta ti tanggal 3 nepi ka tanggal 24 Séptémber 2018, di Buruan Dines Pahubungan Kota Sukabumi, sarta dibuka sacara resmi ku Panjabat Wali Kota Sukabumi, Drs. H. Dady Iskandar, M.M., saréngséna Upacara Pangibaran Bandéra Mérah Putih, cindekna tanggal 3 Séptémber 2018, di Buruan Dines Pahubungan Kota Sukabumi.

Dina biantarana, Panjabat Wali Kota Sukabumi ngajelaskeun, salian sabagé ajang pikeun mupuk prestasi jeung sportivitas, palaksanaan Open Tournamént Bola Voli Wali Kota Sukabumi Cup III Taun 2018 ieu téh, ogé ngarupakeun wadah silaturahmi jeung duduluran antara tim Bola Voli sa Jawa Barat jeung Banten, kaasup jeung warga masarakat katut aparat Dines Pahubungan Kota Sukabumi. Saterusna dijelaskeun, panyalagaraan Open Tournamént Bola Voli ieu téh ngarupakeun agenda rutin taunan, anu dilaksanakeun ku Dines Pahubungan Kota Sukabumi, dina raraga ngareuah-reuah jeung ngagubyarkeun pangéling-ngéling Poé Pahubungan Nasional Tingkat Kota Sukabumi.

Panjabat Wali Kota Sukabumi ngaharepkeun, tina palaksanaan Open Tournamént Bola Voli ieu téh, bisa ngalahirkeun bibit-bibit unggul atlét Bola Voli, pikeun ngarojong kamekaran olah raga Bola Voli di Jawa Barat jeung Banten, hususna di Kota Sukabumi. Salajuna diharepkeun, ku dilaksanakeunnana Open Tournamént Bola Voli ieu téh, bisa ngahudangkeun sumanget warga masarakat hususna para atlét Bola Voli di Jawa Barat jeung Banten, pikeun terus ngukir prestasi.

Salain ti éta, Panjabat Wali Kota Sukabumi ngaharepkeun ka sakumna atlét anu miluan Open Tournamént Bola Voli ieu, sangkan salawasna ngajunjung luhur sportivitas jeung duduluran katut sasama atlét Bola Voli hususna dina mangsa tandang lomba, malar palaksanaan ieu Open Tournamént Bola Voli téh bisa lumangsung sacara hadé, sarta aman, tartib, tengtrem jeung ayem. Sedengkeun ka sakumna aparat Dines Pahubungan Kota Sukabumi, Panjabat Wali Kota Sukabumi ngaharepkeun, sangkan salawasna usaha satékah polah neuleuman jeung paham kana budaya gawé anu hadé jeung profésional, pikeun méré jeung ngaronjatkeun palayanan ka warga masarakat, anu dimimitian ku salam, imut jeung nanya, sarta ngalaksanakeun gawé anu jelas jeung hadé.

Leave a Reply