PANGWANGUNAN GOR JEUNG GEDONG KASENIAN DIJADWALKEUN RÉNGSÉ DINA TAUN 2019 NU BAKAL DATANG

Reporter / Redaktur : ENDANG SUMARDI

Pangwangunan GOR (Gelanggang Olah Raga) Remaja Merdéka Kota Sukabumi jeung Gedong Kasenian Kota Sukabumi, dijadwalkeun réngsé dina taun 2019 nu bakal datang. Lantaran numutkeun Kapala Bappeda (Badan Parancanaan Pangwangunan Daérah) Kota Sukabumi, Ir. H. Rudi Djuansyah, masih aya kakurangan anggaran pikeun tahap finalisasi, sarta éta hal téh keur diajukeun ka Pamaréntah Propinsi Jawa Barat. Anapon anggaran pikeun tahap finalisasi pangwangunan GOR Remaja Merdéka Kota Sukabumi téh, nya éta gedéna 2 miliar rupia, jeung anggaran pikeun pangwangunan Gedong Kasenian Kota Sukabumi gedéna 700 juta rupia, nya éta pikeun paralatan jeung paving buruan. Sedengkeun pikeun lahan parkir jeung pamageran mah, arék diusulkeun deui ka Pamaréntah Propinsi Jawa Barat.

Salajuna diungkabkeun, alokasi anggaran anu diusulkeun ku Pamaréntah Kota Sukabumi ka Pamaréntah Propinsi Jawa Barat pikeun pangwangunan kadua éta gedong téh, moal aya masalah sarta bisa diteruskeun, sok sanajan geus ganti kapamingpinan Gubernur Jawa Barat. Sedengkeun masalah can réngséna pangwangunan kadua éta gedong teh, sakumaha anu dijelaskeun ku Kapala Bappeda Kota Sukabumi, lantaran anggaran anu ditarima ku Pamaréntah Kota Sukabumi ti Pamaréntah Propinsi Jawa Barat téh teu luyu jeung anu diusulkeun ku Pamaréntah Kota Sukabumi ka Pamaréntah Propinsi Jawa Barat.

Kajadiannana éta hal téh lain parancanaan anu dilaksanakeun ku SKPD (Satuan Kerja Parangkat Daérah) nu aya kaitannana kurang mateng, tapi dina mangsa Pamaréntah Kota Sukabumi ngusulkeun ka Pamaréntah Propinsi Jawa Barat, anggarannana teu disatujuan sagemblengna. Sabab dina mangsa Pamaréntah Kota Sukabumi ngusulkeun anggaran pikeun pangwangunan kadua éta gedong ka Pamaréntah Propinsi Jawa Barat téh, APBD (Anggaran Pandapatan Balanja Daérah) Pamaréntah Propinsi Jawa Barat geus disusun jeung alokasina geus jelas. Tah kulantaran kitu, anggaran pikeun pangwangunan kadua éta gedong téh teu disatujuan sagemblengna dina taun anggaran 2018, sarta kudu dilaksanakeun sacara nungtut dina 2 taun anggaran, nya éta dina taun anggaran 2018 jeung dina taun anggaran 2019.

Leave a Reply