PANJABAT WALI KOTA SUKABUMI NGAHATURKEUN NUHUN KA SAKUMNA ASN DI LINGKUNGAN PAMARENTAH KOTA SUKABUMI

Reporter :  ARIF HIDAYAT

Redaktur : ENDANG SUMARDI

Panjabat Wali Kota Sukabumi, Drs. H. Dady Iskandar, M.M., ngahaturkeun nuhun katut layang pangajén anu saluhur-luhurna ka sakumna ASN (Aparatur Sipil Nagara) di lingkungan Pamarentah Kota Sukabumi. Lantaran salila 4 bulan mancén Panjabat Wali Kota Sukabumi, ngarasa ayem, tengtrem jeung kompak, anu pamustungannana pihakna bisa ngajalankeun pancén Panjabat Wali Kota Sukabumi sacara hadé jeung lancar.

Lian ti éta, Panjabat Wali Kota Sukabumi ogé ngawilujengkeun mancén ka Wali Kota katut Wakil Wali Kota Sukabumi Pariodeu Taun 2018-2023, H. Achmad Fahmi, S.Ag., M.M.Pd. katut H. Andri Setiawan Hamami, S.H., M.H., sakaligus ngadoakeun, malar Wali Kota katut Wakil Wali Kota Sukabumi Pariodeu Taun 2018-2023 bisa ngajalankeun pancen sacara hadé jeung lancar.

Ěta hal téh ditepikeun dina Acara Sérén Sumérén Kalungguhan Wali Kota Sukabumi ti Panjabat Wali Kota Sukabumi ka Wali Kota katut Wakil Wali Kota Sukabumi Pariodeu Taun 2018-2023, dina apél isuk pagawé, poé Jumaah isuk, 21 Séptémber 2018, di Buruan Apél Setda Kota Sukabumi.

Salajuna Panjabat Wali Kota Sukabumi meredih ka sakumna ASN di lingkungan Pamarentah Kota Sukabumi, sangkan terus ngajaga kakompakan jeung dédikasi, pikeun ngarojong jeung ngahontal visi jeung misi katut program pangwangunan anu dilaksanakeun ku Wali Kota katut Wakil Wali Kota Sukabumi Pariodeu Taun 2018-2023. Disagigireun ti éta, Panjabat Wali Kota Sukabumi ogé ngingetan pesen Gubernur Jawa Barat, sangkan salawasna ngaronjatkeun ajén palayanan publik jeung ngagunakeun téhnologi informasi pikeun ngawangun daérah, supaya bisa terus mekar jeung inovatif.

Sedengkeun Wali Kota Sukabumi, H. Achmad Fahmi, S.Ag., M.M.Pd., ngucapkeun rasa hormat sakaligus ngahaturkeun nuhun ka Asistén Pamaréntahan, Hukum, HAM (Hak Asasi Manusa) jeung Kesra (Kesejahtraan Rahayat) Setda Propinsi Jawa Barat, Drs. H. Dady Iskandar, M.M., anu geus mancén sacara hadé jeung lancar sabagé Panjabat Wali Kota Sukabumi, anu pamustungannana agénda utama taun 2018, nya éta panyalagaraan Pilkada (Pamilihan Kapala Daerah) Bareng tahun 2018, bisa lumangsung aman, lancar jeung kondusif.

Salian ti éta, Wali Kota Sukabumi ogé ngahaturkeun nuhun ka unsur FKPD (Forum Komunikasi Pimpinan Daerah) Kota Sukabumi, panyalaggara pamilu nya éta KPU (Komisi Pamilihan Umum) Kota Sukabumi jeung Panwaslu (Panitia Pangawas Pamilu) Kota Sukabumi katut sakumna warga masarakat Kota Sukabumi, anu geus usaha satékah digawé nyukséskeun Pilkada Bareng Taun 2018 di Kota Sukabumi, sarta lumangsung  lancar, tiis, aman jeung kondusif.

Saterusna dijelaskeun, panyalagaraan Pilkada Bareng Taun 2018 geus réngsé. Tah ku hal éta téh, pajoangan kakara arék dimimitian. Tah ku lantaran kitu, Wali Kota Sukabumi cumeluk sakaligus umajak ka sakumna pihak khususna ASN di lingkungan Pamarentah Kota Sukabumi sangkan digawé babarengan, utamana dina ngahontal jeung ngawujudkeun visi katut misi 5 taun ka hareup, nya éta Ngawujudna Kota Sukabumi anu religius, ayem jeung sajahtra.

Leave a Reply