ACARA PANGISTRÉNAN PASANGAN WALI KOTA KATUT WAKIL WALI KOTA SUKABUMI PARIODEU TAUN 2018-2023

Reporter / Redaktur : ENDANG SUMARDI

Acara panyalagaraan panyumpahan jeung pangistrénan pasangan Wali Kota katut Wakil Wali Kota Sukabumi Pariodeu Taun 2018-2023, H. Achmad Fahmi, S.Ag., M.M.Pd. katut H. Andri Setiawan Hamami, S.H., M.H. hasil Pilkada (Pamilihan Kapala Daérah) Bareng Taun 2018 gelombang kahiji ku Gubernur Jawa Barat. H. Mochamad Ridwan Kamil, S.T., M.U.D. katut 5 pasangan Kapala Daérah Kabupatén jeung Kota lianna di Jawa Barat, cindekna tanggal 20 Séptémber 2018, di Gedong Merdéka Bandung, Jalan Asia-Afrika Kota Bandung, lumangsung hidmat jeung lancar sarta aman jeung tartib. Lantaran saméméhna dilaksanakeun heula acara gladi resik, cindekna tanggal 19 Séptémber 2018, sarta diamankeun ku 850 urang aparat kaamanan ti rupa-rupa unsur.

Anapon ka 5 pasangan Kapala Daérah Kabupatén jeung Kota lianna di Jawa Barat anu disumpah jeung diistrénan dina gelombang kahiji bareng jeung pasangan Wali Kota katut Wakil Wali Kota Sukabumi téh, nya éta Bupati katut Wakil Bupati Bandung Barat, Bupati katut Wakil Bupati Purwakarta, Bupati katut Wakil Bupati Sumedang, Wali Kota katut Wakil Wali Kota Bandung, sarta Wali Kota katut Wakil Wali Kota Bekasi.

Acara panyalagaraan panyumpahan jeung pangistrénan pasangan Wali Kota katut Wakil Wali Kota Sukabumi sarta 5 pasangan Kapala Daérah Kabupatén jeung Kota lianna di Jawa Barat téh, dimimitian ku kagiatan sérémoni historical walk, nya éta basa para kapala nagara ti nagara-nagara Asia jeung Afrika leumpang ti Hotél Savoy Homan ka Gedong Merdéka Bandung, cindekna basa miluan Konferénsi Asia-Afrika munggaran taun 1955. Ěta kagiatan sérémoni téh, dilaksanakeun deui ku Gubernur Jawa Barat jeung pasangan Wali Kota katut Wakil Wali Kota Sukabumi sarta 5 pasangan Kapala Daérah Kabupatén jeung Kota lianna di Jawa Barat, anu dimimitian ti pukul 08.45 WIB, pikeun nyoréang alam ka tukang sakaligus miéling kagiatan historical walk anu dilaksanakeun ku para kapala nagara ti nagara-nagara Asia jeung Afrika basa miluan Konferénsi Asia-Afrika munggaran taun 1955, di Gedong Merdéka Bandung. Lian ti éta, palaksanaan éta sérémoni téh, direuah-reuah ku arak-arakan rupa-rupa jenis kasenian ciri has Jawa Barat.

Sanggeus acara panyalagaraan panyumpahan jeung pangistrénan réngsé, Gubernur Jawa Barat jeung pasangan Wali Kota katut Wakil Wali Kota Sukabumi sarta 5 pasangan Kapala Daérah Kabupatén jeung Kota lianna di Jawa Barat, langsung ngajugjug Gedong Saté Bandung, sabagé Puseur Pamaréntahan Propinsi Jawa Barat jeung puncak runtuyan palaksanaan panyumpahan jeung pangistrénan, nya éta numpak 14 Délman Hias, anu ngawengku 2 délman ditumpakan ku Gubernur katut Wakil Gubernur Jawa Barat, sarta 12 délman ditumpakan ku pasangan Wali Kota katut Wakil Wali Kota Sukabumi sarta 5 pasangan Kapala Daérah Kabupatén jeung Kota lianna di Jawa Barat. Sedengkeun unsur FKPD (Forum Komunikasi Pingpinan Daérah) Kawilayahan nuturkeun ti tukang, nya éta numpak kandaraan Bandros.

Leave a Reply