WALI KOTA SUKABUMI NGAWANOHKEUN PANGOPRASIAN BEUS DAMRI TRAYÉK SUKABUMI-BANDARA SOEKARNO HATTA

Reporter / Redaktur : ENDANG SUMARDI

Wali Kota Sukabumi, H. Achmad Fahmi, S.Ag., M.M.Pd., sacara resmi ngawanohkeun pangoprasian Beus Perum Damri (Pausahaan Umum Djawatan Angkutan Motor Républik Indonésia) Trayék Sukabumi-Bandara Soekarno Hatta, cindekna saréngséna Upacara Puncak Pangéling-ngéling Poé Pahubungan Nasional sarta Poé Agraria jeung Tata Rohang Taun 2018 Tingkat Kota Sukabumi, tanggal 24 Séptémber 2018, di Buruan Apél Dines Pahubungan Kota Sukabumi.

Hadir dina kesempetan éta, unsur FKPD (Forum Komunikasi Pingpinan Daérah) Kota Sukabumi, Panjabat Sekertaris Daérah Kota Sukabumi, Ketua TP PKK katut DWP (Dharma Wanita Pasatuan) Kota Sukabumi, para Asistén Setda Kota Sukabumi, para Kapala OPD (Organisasi Parangkat Daérah) jeung Instansi Vértikal, para Alim Ulama, para Sesepuh, Inohong Masarakat, Pamuda jeung Wanoja, sarta para tamu ondangan liainna.

Dina biantarana, Wali Kota Sukabumi nandeskeun, Pamaréntah Kota Sukabumi ngabagéakeun sacara hadé kana palayanan Perum Damri, anu muka aksés transportasi Beus Trayék Sukabumi-Bandara Soekarno Hatta jeung sabalikna. Lantaran ayana Beus Damri Trayék Sukabumi-Bandara Soekarno Hatta ieu téh, geus heubeul pisan dianti-anti ku warga masarakat Sukabumi. Salian ti éta, Wali Kota Sukabumi ngaharepkeun ka sakumna lapisan warga masarakat anu ngagunakeun kandaraan pribadi anu rék muru Bandara Soekarno Hatta, sangkan ngagunakeun Beus Damri, pikeun ngurangan kamacétan patali marga.

Sedengkeun Diréktur Kauangan Perum Damri, Sri Purwanto ngajelaskeun, Beus Damri ieu téh baris ngalayanan warga masarakat Kota Sukabumi anu rék ngajugjug Bandara Soekarno Hatta, nya éta pukul 00.00 tengah peuting, pukul 2 janari, pukul 4 subuh, pukul 6 isuk, jeung pukul 8 isuk. Saterusna ti Bandara Soekarno Hatta ka Kota Sukabumi, nya éta pukul 8 isuk, pukul 10 beurang, pukul  1 beurang, pukul 4 sore, jeung pukul 7 peuting. Anapon jumlah armada beus sagemblengna aya 5 Beus Damri anu kapasitasna masing-masing 40 panumpang.

Disagigireun ti éta ogé dijelaskeun, pikeun warga masarakat anu rék ngagunakeun Beus Damri, bisa diaksés di Pool Damri Degung Kota Sukabumi, Jalan  K.H. Ahmad Sanusi Kota Sukabumi, anu ruteu pajalanannana nya éta Jalan K.H. Ahmad Sanusi Kota Sukabumi, Jalan Lingkar Selatan Kota Sukabumi, Jalan Raya Sukabumi, Bogor jeung Ciawi, sarta Jalan Tol Jagorawi (Jakarta-Bogor-Ciawi), Jalan Tol Sedyatmo jeung réngsé di Bandara Soekarno-Hatta, sarta ongkosna pikeun satiap panumpang nya éta gedéna Rp. 100  rébu.

Leave a Reply