KAPALA DINES KASÉHATAN KOTA SUKABUMI NGAHATURKEUN NUHUN KA BAZNAS KOTA SUKABUMI

Reporter / Redaktur : ENDANG SUMARDI

Kapala Dines Kaséhatan Kota Sukabumi. dr. Hj. Ritanénny Ědlien Silyéna Mirah., ngahaturkeun nuhun ka Baznas (Badan Amil Zakat Nasional) Kota Sukabumi, anu geus ngahibahkeun hiji unit mobil ambulance ka Dines Kaséhatan Kota Sukabumi, cindekna tanggal 21 Séptémber 2018, sarta disaksian langsung ku Wali Kota Sukabumi, H. Achmad Fahmi, S.Ag., M.M.Pd. Saterusna dijelaskeun, éta mobil ambulance téh statusna milik Baznas Kota Sukabumi, jeung nurutkeun rarancangna éta mobil ambulance téh arék disimpen di Rumah Sakit Al Mulk Kota Sukabumi, sarta taya tarif séwa alias haratis.

Sedengkeun Ketua Baznas Kota Sukabumi, Ir. H. Fifi Kusumajaya, M.M. ngajelaskeun, éta mobil ambulance téh pikeun dimangpaatkeun jeung digunakeun ku masarakat Kota Sukabumi, utamana anu teu mampuh. Salian ti éta ogé dijelaskeun, dipasrahkeunnana hibah éta mobil ambulance téh, ngarupakeun bagian tina pandayagunaan ZIS (Zakat, Infaq jeung Shodaqoh), anu disalurkeun ngaliwatan Baznas. Disagigireun ti éta, Baznas Kota Sukabumi hayang leuwih terus terang ka masarakat Kota Sukabumi, hususna dina ngadayagunakeun ZIS anu disalurkeun ngaliwatan Baznas.

Leuwih jauh Ketua Baznas Kota Sukabumi ngajelaskeun. sumber pandapatan ZIS anu ditarima ku Baznas Kota Sukabumi téh, kakara sabagian ti PNS atawa ASN (Aparatur Sipil Nagara), sarta pasaurangan, lembaga jeung pausahaan, anu geus mercayakeun jeung nyalurkeunnana ka Baznas. Saterusna dijelaskeun, pandapatan ZIS anu ditarima ku Baznas Kota Sukabumi téh tacan maksimal. Tah ku lantaran kitu, Baznas Kota Sukabumi arék terus usaha satékah polah ngalaksanakeun sosialisasi ka sakumna lapisan masarakat Kota Sukabumi. Sabab ku luhurna pandapatan ZIS anu ditarima ku Baznas téh, mangpaatna jeung pandayagunaannana ogé baris leuwih luhur deui.

Satuluyna Ketua Baznas Kota Sukabumi meredih ka Pamaréntah Kota Sukabumi, sangkan bisa ngadorong jeung ngabantu nyusun Paraturan Daérah Kota Sukabumi, anu ngatur ASN wajib mayar jeung nyalurkeun zakat, sarta masarakat di luar ASN bisa mayar jeung nyalurkeun zakat ngaliwatan Baznas, pikeun ngamaksimalkeun pandapatan zakat, anu pamustungannana pandayagunaannana bisa ngadongkang leuwih lega jeung leuwih réa masarakat anu bisa dibantu.

Dina kasempetan éta, Baznas Kota Sukabumi ogé masrahkeun bantuan ka 2.000 anak yatim piatu sa Kota Sukabumi, dina raraga ngagumebyarkeun 10 Muharam 1440 Hijriyah. Ěta bantuan téh dipasrahkeun sacara simbolis ku Wali Kota Sukabumi, H. Achmad Fahmi, S.Ag., M.M.Pd., dibarengan ku Ketua Baznas Kota Sukabumi jeung Pangurus DKM Masjid Agung Kota Sukabumi.

Leave a Reply